काठमाडौं (हाम्रो खेलकुद )-  शेरबहादुर खड्का स्मृति प्रतिष्ठानको आयोजनामा हुने केएनपी नेरोलेक आठौं शेरबहादुर खड्का स्मृति राष्ट्रिय महिला भलिबल प्रतियोगिताको तयारी पूरा भएको आयोजकले जनाएको छ ।

प्रतियोगिता त्रिपुरेश्वरस्थित राष्ट्रिय खेलकुद परिषद्को कभर्डहलमा बुधबार सुरु हुँदैछ । सहभागी ५ टोलीलाई २ समूहमा विभाजन गरी लिग कम नकआउट आधारमा खेल खेलाइने छ ।

समूह ‘बी’ मा साविक विजेता एपीएफ, एभरेष्ट र नेपाल आर्मी तथा समूह ‘बी’ मा साविक उपविजेता नेपाल पुलिस क्लब र टिप टप न्यु डायमन्ड रहेका छन् ।
पहिलो दिन २ खेल हुनेछ ।  पहिलो खेल आर्मी र एपिएफबीच हुनेछ । अर्कोमा पुलिसले न्यु डायमन्ड विरुद्ध खेल्ने छ ।

विजेताले  ४ लाख ९९ हजार र  उपविजेताले २ लाख ५० हजार र तेस्रो हुनेले १ लाख २५ हजार रुपैयाँ प्राप्त गर्ने छ ।

प्रतियोगिताका सर्वोत्कृष्ट खेलाडीले५० हजार हजार ,विधागततर्फ उत्कृष्ट सेटर, डिफेन्स, सर्भर, लिबेरो, स्पाइकर र प्रशिक्षकले जनही २५ हजार रुपैयाँ प्राप्त गर्नेछन्। हरेक खेलको प्लेयर अफ द म्याचले १५ हजार रुपैयाँ प्राप्त‌ गर्ने आयोजक प्रतिष्ठान अध्यक्ष रञ्जन खड्काले जनाएका छन् ।

प्रतियोगिताको उद्घाटनका अवसरमा एक राष्ट्रिय महिला खेलाडीलाई नगद ५० हजार रुपैयाँसहित ‘शेरबहादुर खड्का स्पेसल अवार्ड’ बाट सम्मानित गरिने छ । एक प्रशिक्षकलाई पनि ५० हजार नगदबाट पुरस्कृत गरिने छ ।

पुरस्कार राशि मात्रै १३ लाखभन्दा बढी रहेको प्रतियोगिताको अनुमानित बजेट करिब ५० लाख रुपैयाँ रहेको प्रतिष्ठानका अध्यक्ष खड्काले जानकारी दिए । फाइनल बैशाख १३ गते हुनेछ ।

अध्यक्ष खड्काले प्रतियोगितालाई बहुराष्ट्रिय पेन्ट कम्पनी केएनपी नेरोलेकले मुख्य प्रायोजन गरेको बताए । महिला भलिबल खेलाडीको सशक्तिकरण र क्षमता अभिवृद्धि गर्ने उद्देश्यले प्रतिष्ठानले २०७२ सालदेखि हरेक वर्ष राष्ट्रिय महिला भलिबल प्रतियोगिता आयोजना गर्दै आएको छ ।

सातौं संस्करण सकिँदा एपीएफले ६ पटक उपाधि जितेको छ भने न्यु डायमन्ड स्पोर्ट्स क्लबले छैटौं संस्करणको उपाधि जितेको थियो ।