काठमाडौं (हाम्रो खेलकुद)- आठौं केएनपी नेरोल्याक राष्ट्रिय महिला भलिबल प्रतियोगीतामा त्रिभुवन आर्मी क्लबले पहिलो जित हात पारेको छ।

राष्ट्रिय खेलकुद परिषदको कभर्ड हलमा आज भएको पहिलो खेलमा आर्मीले एभरेस्ट भलिबल क्लबलाई ३-० को सोझो सेटमा हरायो।

एकपक्षीय खेलमा आर्मीले एभरेस्टलाई २५-१६, २५-१८ र २५-१७ को सोझो सेटमा हरायो। योसँगै यो समुहमा सशस्त्र प्रहरी बल (एपिएफ) र त्रिभुवन आर्मीले एक-एक खेल जितेका छन्।

आर्मीले दुई खेलबाट ३ अंक बनाएको छ। एपिएफले एक खेलबाट ३ अंक बनाइसकेको छ। अब आजै हुने दिनको दोस्रो खेलमा एभरेष्ट र एपिएफबीच खेल हुनेछ।

यदि सो खेलमा एक सेट मात्र गुमाएर खेल जिते पनि एभरेष्ट भलिबल क्लब समुह चरणबाटै बाहिरिनेछ। यदि एपिएफले खेल जितेमा एभरेष्ट भलिबल क्लब समुह चरणबाटै बाहिरिनेछ।

अर्को समुहमा नेपाल पुलिस क्लब र टिपटप न्यु डायमण्ड मात्र रहेको कारण दुवै टिम सेमिफाइनलमा पुगिसकेका छन्। हिजो पुलिसले न्यु डायमण्डलाई हराएकोले भने पुलिस समुह विजेता बन्दै सेमिफाइनलमा पुगिसकेको छ।

प्रतियोगितामा कुल ५ टिमको सहभागीता रहेको छ। विजेताले ४ लाख ९९ हजार नगद पुरस्कार प्राप्त गर्नेछ। दोस्रो र तेस्रो हुने टिमले क्रमश २ लाख ५० हजार र १ लाख २५ हजार प्राप्त गर्नेछन्।