काठमाडौं (हाम्रो खेलकुद)- छ पटकको विजेता सशस्त्र प्रहरी बल (एपिएफ) र नेपाल पुलिस क्लब आठौं केएनपी नेरोल्याक राष्ट्रिय महिला भलिबल प्रतियोगीताको उपाधिको लागि भिड्ने भएका छन्।

राष्ट्रिय खेलकुद परिषदको कभर्ड हलमा आज भएको सेमिफाइनलमा अब्बल प्रदर्शन गरिरहेको एपिएफले टिपटप न्यु डायमण्ड स्पोर्टस क्लबलाई ३-१ ले माथ दियो।

पहिलो सेट २५-१६ ले जित्दै एपिएफले १-० को अग्रता बनायो। दोस्रो सेटमा न्यु डायमण्डले एपिएफलाई चुनौती दियो। तर पनि एपिएफ २५-२२ ले दोस्रो सेट जित्दै २-०को अग्रता बनाउन सफल रह्यो।

तेस्रो सेटमा भने एपिएफलाई दबाब दिन न्यु डायमण्ड सफल रह्यो। यो सेट एपिएफले २३-२५ ले गुमायो। न्यु डायमण्डले खेललाई २-१ मा पुर्यायो।

तर चौथो सेट २५-२३ ले आफ्नो पक्षमा पार्दै एपिएफले फाइनलमा स्थान सुरक्षित गर्यो। एपिएफ सातौं पटक च्याम्पियन बन्ने दाउमा छ।

अर्को सेमिफाइनलमा पुलिसले अर्को विभागीय टोली त्रिभुवन आर्मी क्लबलाई ३-० ले हराउँदै फाइनलको यात्रा तय गर्यो। पुलिसले २५-६, २५-२३ र २५-२२ को जितमा फाइनलको यात्रा तय गरेको हो।

एपिएफ र नेपाल पुलिस क्लब दुवै समुह विजेता बन्दै सेमिफाइनलमा पुगेका थिए। एपिएफले समूह चरणमा आर्मी र एभरेष्ट भलिबल क्लबलाई हराएको थियो। पुलिसले भने न्यु डायमण्डलाई माथ दिएको थियो।

प्रतियोगितामा कुल ५ टोली को सहभागिता रहेको छ। विजेताले ४ लाख ९९ हजार, दोस्रो टोली २ लाख ५० हजार र तेस्रो टोलीले १ लाख २५ हजार रुपैयाँ प्राप्त गर्नेछ। तेस्रो स्थान र फाइनल भोलि हुनेछ।