काठमाडौं (हाम्रो खेलकुद) – नेपाली पुरुष राष्ट्रिय भलिबल टोली तथा विभागीय नेपाल पुलिस क्लबका मिडल ब्लकरद्धय सफल विश्वकर्मा र रविन नगरकोटीलाई उपचारको लागि जापानबाट आर्थिक सहयोग प्रदान गरिएको छ ।

नेपाल युथ स्पोर्ट्स क्लब जापानले पोखरामा यसै साता सम्पन्न प्रथम लायन्स कप आमन्त्रित पुरुष भलिबल प्रतियोगिता दौरान घाइते भएका सफल र रविनलाई हौसला स्वरुप आर्थिक सहयोग प्रदान गरिएको क्लबका अध्यक्ष बसन्त थापाले जानकारी दिएका छन् । तत्कालका लागि खेलाडीद्धयलाई ५० हजार रुपैयाँ प्रदान गरिएको थापाले बताए ।

रविनलाई एपिएफविरुद्धको सेमिफाइनलमा तथा सफललाई भारतीय टोलीविरुद्धको खेलमा चोट लागेको थियो । ब्लक गर्ने क्रममा रविनको दायाँ हातको औलाको भाग च्यातिएको छ । सफलको बायाँ खुट्टामा चोट लागेको छ ।

पछिल्ला घरेलु प्रतियोगितामा पुलिसलाई एक पछि अर्काे सफलता दिलाएका र सानदार प्रदर्शन गरिरहेका मिडल ब्लकरको यि दुई जोडी लायन्स कपको फाइनलमा नहुँदा पुलिसको प्रदर्शनमा असर गर्यो ।

पुलिसका प्रशिक्षक चन्द्र कुवँर आफ्नो महत्वपूर्ण दुवै मिडल ब्लकर जेठ ८ बाट १५ गतेसम्म पोखरामा आयोजना हुन लागेको एनभिए क्लब लिगका लागि तयार हुनेमा आशावादी छन् ।

‘खेलाडी मान होइन सम्मान हो, खेलकुद शान होइन हाम्रो पहिचान हो’ भन्ने मुल नाराका साथ स्थापित नेपाल युथ स्पोट्र्स क्लब जापानले नेपाली भुमिमा रहेर भलिबल खेलिरहेका भलिबल खेलाडीहरुलाई खेल मैदानमा हुने दुर्घटना पश्चातको उपचार गर्न तथा दिर्घरोगी भलिबल खेलाडीहरुका लागि उपचारार्थ सहयोग गर्ने क्लबको उद्देश्य रहेको अध्यक्ष थापाले बताए ।

जापानमा बर्षेनी भलिबल प्रयोतियोगिता आयोजना तथा विभिन्न भलिवल प्रतियोगिताहरुमा सहभागिता जनाउँदै आएको क्लबले प्रवासमा रहेका नेपाली भलिबल खेलाडीहरुलाई हौसला प्रदान गर्दै आएको छ ।

प्रवासमा मात्र नभई स्वदेशमा समेत भलिवल खेललाई आफ्नो मुख्य पेशा बनाउँदै आएका खेलाडीहरुलाई हौसला प्रदान गर्दै आगामी दिनमा विभिन्न क्षेत्रमा सहयोग गर्ने उद्देश्य क्लबको रहेको अध्यक्ष थापाले बताए ।