हेटौंडा (हाम्रो खेलकुद)- चर्चित राष्ट्रिय कराते खेलाडी धादिङकी एरिका गुरुङ बागमती स्पोर्टस अवार्डमा वर्षको उत्कृष्ट महिला खेलाडीको अवार्ड प्राप्त गरेकी छिन्।

बागमती प्रदेश युवा तथा खेलकुद मन्त्रालयको आयोजना भएको स्पोर्टस अवार्ड बागमती प्रदेशको राजधानी हेटौंडाको हुप्रा चौरमा भएको थियो‌ ।

कार्यक्रममा एरिकालाई उत्कृष्ट महिला खेलाडीको अवार्ड प्रदान गरिएको हो। अवार्डसँगै उनलाई १ लाख रुपैयाँ पनि प्रदान गरिएको छ।

छोटो समयमा एरिकाले प्राप्त गरेको सफलता र पदक लोभलाग्दो छ। स्टार कराते खेलाडी एरिकाले गत वर्ष २०औं सिनियर एकेएफ च्याम्पियनसिपमा ऐतिहासिक रजत हात पारिन्। एसियन कराते फेडरेसनले आयोजना गर्ने एसियाको प्रतियोगितामा नेपालले जितेको यो पहिलो पदक बन्यो।

यसअघि १९औं एसियाली खेलकुदमा २५ वर्षको व्यक्तिगत रजतको खडेरीलाई तोडिन् । उनले पहिलो पटक नेपाललाई करातेमा एसियन गेम्सबाट रजतको ऐतिहासिक सफलता दिलाईन। यो सँगै उनी नेपाली करातेलाई‌ सर्वाधिक ठुलो पदक दिलाउने खेलाडी बनिन। उनले १९ वर्षको उमेरमा यो सफलता प्राप्त गरेकाि थिइन्।

अधिकांश अन्तराष्ट्रिय प्रतियोगितामा उनी पदक जितिरहने खेलाडीको अग्रसुचीमा छिन्। करिब दुई वर्षको छोटो अन्तराष्ट्रिय करियरमा उनले ८ अन्तराष्ट्रिय प्रतियोगितामामा देशको लागि ५ स्वर्ण र ४ रजत गरी कुल ९ पदक जितेकी छिन्। मात्र एक प्रतियोगितामा उनी पदक विजिन हुनपरेको छ।

उनी नेपाली करातेकी निर्विवाद सर्वाधिक सफल खेलाडी हुन्। अवार्डमा यो पटक कुल ८ विधामा १३ खेलाडी तथा खेल व्यक्तित्वलाई अवार्ड र नगद सहित सम्मान गरिएको छ।