बिर्तामोड (हाम्रो खेलकुद)- उभौली पर्वको अवसरमा सम्पन्न प्रथम राष्ट्रब्यापी रेटिङ बुद्धिचालको उपाधि सिएम पुरुषोत्तम चौलागाईंले जितेका छन्। 

पूर्व नेपाल च्याम्पियन पुरुषोत्तमले आठ खेलमा जित निकाली ८ अंक प्रोग्रेसिभ प्वाइन्टका आधारमा उपाधि जितेका हुन्।

एक खेलमा हार व्यहोरेका चौलागाईंले महत्त्वपूर्ण फाइनल खेलमा खोटाङका धिरेन राईलाई पराजित गरे। उनले ट्रफी सहित ५१ हजार रुपैयाँ प्राप्त गरे ।

स्पर्धामा फिडे मास्टर रुपेश जैशवालले समान ८ अंक नै जोडे पनि पुरुषोत्तमसंग प्रोग्रेसिभ अंकको आधारमा पछि पर्दै दोस्रो स्थानमा रहे।

नेपाल च्याम्पियन रुपेशले अन्तिम खेलमा सुनसरीका राजेन्द्र राईलाई निकै कठिन खेलमा पन्छाउदै ३५ हजार रुपैयाँ पाए।

सिएम नवीन तण्डुकार तेस्रो स्थानमा रहे। पूर्व नेपाल च्याम्पियनले नवौं चरणको खेलमा ललितपुरका सरोज महर्जनलाई हराए । उनले ३० हजार रुपैयाँ प्राप्त गरे।
पुरुषोत्तमसंग हारेका धिरेन राई चौथो भए र २५ हजार रुपैयाँ प्राप्त गरे। आयोजक बिर्तामोड चेस क्लबका ज्वाला इम्बुङ पाँचौ भए र उनले २० हजार रुपैयाँ जिते ।

प्रतियोगितामा विधागत तर्फ नव प्रवेशी जीवन राई, सिनियरमा वसन्त लामा, महिला कृतिसारा अधिकारी, झापा जिल्ला राज लिम्बू, रेटिङ १६ सयमा डा. सन्तोष प्रसाद साह, १८ सयमा विनय थापा, युवा १४ कृष्णप्रसाद भारती, युवा १८ सम्यक श्रेष्ठ उत्कृष्ट बने।

स्थानीय तर्फ विष्णुप्रसाद पाठक, राज श्रेष्ठ, क्षितिज लिम्बू , महिलामा विनिता राई , स्कुल तर्फ आदर्श रिजाल, निश्चल पाठक, सुलभ ओझा , प्रदेश तर्फ विश्वविजय घिमिरे, अनुशासित हरिकुमार गुरुङ, फरक क्षमतामा लक्ष्मीप्रसाद कन्दङ्वा उत्कृष्ट बन्दै नगद पुरस्कार प्राप्त गरे।

३३ जनाले ३ लाख ३५ हजार ५ सय रुपैयाँ प्राप्त गरे। बिर्तामोड नगरपालिका प्रमुख पवित्रा महतारा प्रसाईं , हेराकाजी महर्जन, प्रायोजक किरात याक्थुक चुम्लुङका भिममाया नेम्वाङ, जिल्ला सचिव हिमालय कन्दङ्वा, नगर अध्यक्ष समेतले विजेता खेलाडीहरुलाई पुरस्कार वितरण गरे।