काठमाडौं (हाम्रो खेलकुद)- पूर्व नम्बर एक गल्फर शुक्र बहादुर राई र भुवन कुमार रोक्का सूर्य नेपाल च्यालेन्जको पहिलो दिन संयुक्त रुपमा शीर्षस्थानमा रहन सफल भएका छन्।

पार-६८ को रोयल नेपाल गल्फ क्लबमा शुक्र र भुवनले आज ७-अन्डर ६१ को सानदार स्कोरमा दिनेश प्रजापतिलाई ३ स्ट्रोकले पछि पारे।

करिब दुई वर्षपछि घरेलु टुरमा फर्किएका शुक्रले सानदार कमब्याक गरेका छन्। उनले बोगी रहित कार्ड बनाए। तेस्रो र चौथो होलको बर्डीले फ्रन्ट नाइन २-अन्डर ३२ मा सकाए। ब्याक नाइनमा उनले कुल ५ बर्डी प्रहार गरे।

१०औं र ११औं‌ तथा यसपछि १३औं देखि १५औं होलमा लगातार तीन बर्डी प्रहार गरे। ब्याक नाइन ५-अन्डर २९ मा पुरा गरे। चोटपछि उनले भारतीय गल्फ टुर खेलिरहेका छन्।

भुवनले पनि सानदार प्रदर्शन गरे। फ्रन्ट नाइनमा ५-अन्डर २९ को नतिजा निकाले। उनले पहिलो, चौथो, छैटौं, सातौं र आठौं होलमा बर्डीको सफलता गरे। यसपछि १०औं, १३औं र १४औं होलमा एक-एक सट बचाए। १६औं‌ होलको बोगीले ब्याक नाइन २-अन्डर ३२ मा सकाए।

तेस्रो स्थानमा रहेका दिनेशले ४-अन्डर ६४ को स्कोर जोडे। नेपाल नम्बर एक भुवन नगरकोटी ३-अन्डर ६५ सहित चौथो र रामे मगर २-अन्डर ६६ को स्कोरमा पाँचौं स्थानमा रहेका छन्।

१-अन्डर ६७ को स्कोरमा प्रदीप कुमार लामा, दीपक मगर, निरज तामाङ, जयराम श्रेष्ठ र साबिक विजेता रवि खड्काले संयुक्तरुपमा छैटौं स्थान बाँडे।

एमेच्योरतर्फ फुन्सोक नोर्बु लामा र राहुल विश्वकर्मा इभन-पार ६८ को स्कोरमा संयुक्तरुपमा शीर्षस्थानमा रहेका छन्। उनीहरूले बलराम पौडेल र निश्चयजङ्ग रायमाझीलाई एक स्ट्रोकले पछि पारेका छन्। बलराम र निश्चयले १-ओभर ६९ स्कोर गरे।

७२ होलको ४ दिने प्रतियोगितामा ३६ प्रोफेसनल र ११ एमेच्योर गरी कुल ४७ खेलाडीको सहभागिता छ। ३६ होलको समाप्तीमा कट लागु हुनेछ। जहाँ शीर्ष २१ प्रोफेसनल र एमेच्योर खेलाडीले बाँकी ३६ होलको लागि स्थान बनाउनेछन्।

कुल ६ लाख रुपैयाँ पुरस्कार रहेको प्रतियोगिताको विजेताले १ लाख १० हजार, दोस्रोले ७० हजार र तेस्रोले ५० हजार रुपैयाँ प्राप्त गर्नेछन् । साथै शीर्ष २१ भित्र पर्ने प्रोफेसनल गल्फरले पनि नगद प्राप्त गर्नेछन्।मुख्य स्पर्धा पछि शनिवार प्रो-एम प्रतिस्पर्धा हुनेछ।