काठमाडौं (हाम्रो खेलकुद)- नेपाल नम्बर एक गल्फर सदभाव आचार्यको कोर्स रेकर्डमा नेपाल ‘ए’ ले ११औं संस्करण नेपाल एमेच्योर ओपन गल्फ च्याम्पियनसिपको टिम स्पर्धामा स्वर्ण पदक जितेको छ।

नेपाल ‘ए’ का सदभाव र राहुल विश्वकर्माको जोडीले ३६ होलको समाप्तिमा २४-अन्डर २ सय ६४ को सानदार स्कोर‌मा स्वर्ण जितेको हो।

गोकर्ण गल्फ क्लबमा सदभावले १२-अन्डर ६० को नयाँ कोर्स रेकर्ड बनाए।‌ राहुलले आज ४-अन्डर ६८ स्कोर दर्ज गरे। नेपाल ‘ए’ ले १६-अन्डर १ सय २८ को स्कोरमा भुटानलाई २४ स्ट्रोकले हरायो।

निम दोर्जी तामाङ र डेचेन लेन्डुपको भुटानी टिम काउन्ट ब्याकमा दोस्रो भयो। भुटान र बंगलादेश इभन-पार २८८ मा बराबरी भएपछि काउन्ट ब्याकमा नतिजा आएको हो। सफिकुल इश्लाम र मोहम्मद सहाब उद्दीन सम्मिलित बंगलादेशको टिमले कास्य पदक हात पार्यो।

च्याम्पियनसिपको दोस्रो दिन बुधवार व्यक्तिगत स्पर्धामा सदभाव शीर्षस्थानमा कायमै छन्। ३६ होलको समाप्तिमा समग्रमा १८-अन्डर १ सय २६ को स्कोरमा सदभावले भारतका सुमित कोटवाललाई ८ स्ट्रोकले पछि पारे।

सदभावले १२-अन्डर ६० को सानदार स्कोरमा प्रोफेसनल गल्फर शुक्र बहादुर राईको नाममा रहेको ११-अन्डर ६१ को रेकर्ड तोडेका हुन्। शुक्रले सन् २०२३ को सूर्य नेपाल सेन्ट्रल ओपनमा सो रेकर्ड बनाएका थिए।

कोर्स रेकर्ड बनाउने क्रममा सदभावले १२ बर्डी‌ प्रहार गरे। फ्रन्ट र ब्याक नाइन दुवैमा ६-अन्डर ३० को स्कोर निकाले। सदभावले पहिलो होलमा बर्डी प्रहार गर्दै दोस्रो दिनको सुरुआत गरे। यसपछि तेस्रो देखि छैटौं होलमा लगातार ४ र नवौं होलमा पनि अर्को बर्डीको सफलता प्राप्त गरे।

यसपछि ११औं देखि १५औं होलमा लगातार ५ बर्डी प्रहार गर्दा शुक्रको रेकर्ड बराबरी गरेका थिए। १६औं र १७औं होलमा पार जोगाए। १८औं होलको बर्डीले कोर्स रेकर्ड बनाउन सफल भएका हुन्।

यो स्कोर उनको करियरको उत्कृष्ट प्रदर्शन हो। उनले गत बर्ष सूर्य नेपाल एनपिजिए टुर च्याम्पियनसिपमा ८-अन्डर ६४ को स्कोर निकालेका थिए।

दोस्रो स्थानमा उक्लिएका सुमितले समग्रमा १०-अन्डर १ सय ३४ स्कोर गरे। उनले आज ८-अन्डर ६४ को स्कोर दर्ज गरे।

पहिलो, दोस्रो, चौथों, छैटौं, सातौं र नवौं होलको बर्डीले फ्रन्ट नाइन ६-अन्डर ३० मा सकाए। ब्याक नाइनमा पनि सुमितले ११औं, १२औं, १५औं र १८औं होलमा एक-एक सट बचाए। तर ४-पारको १४औं होलमा डबल बोगी खेप्न पुगे। ब्याक नाइन २-अन्डर ३४ मा पूरा गरे।

नेपालका राहुल समग्रमा ६-अन्डर १ सय ३८ सहित तेस्रो स्थानमा छन्। उनले आज ४-अन्डर ६८ को स्कोर कार्ड बनाए।

फ्रन्ट नाइन १-अन्डर ३५ र ब्याक नाइन ३-अन्डर ३३ मा सकाए। तेस्रो, सातौं, १२औं, १४औं र १५औं होलमा बर्डी प्रहार गर्दा चौथों होलमा एक सट खेर फाले।

महिलातर्फ भारतकी अनन्थी विवेक समग्रमा ३-अन्डर १ सय ४१ सहित भारतकै दिया क्रिस कुमारलाई १४ स्ट्रोकले पछि पार्दै शीर्षस्थानमा कायमै रहेकी छिन्। आज अनन्थीले २-अन्डर ७० को स्कोरमा खेल सकाइन्।

आज १-अन्डर ७१ को स्कोरमा दिया समग्रमा ११-ओभर १ सय ५५ सहित दोस्रो स्थानमा छिन्। नेपालकी तारा कार्की चित्रकारले समग्रमा १९-ओभर १ सय ६३ सहित तेस्रो स्थानमा छिन्। आज उनले ११-ओभर ८३ मा खेल पुरा गरिन्।

च्याम्पियनसिपको यु-१६ ब्वाइजतर्फ भारतका भिभान उभायकर समग्रमा १-ओभर १ सय ४५ सहित ४ स्ट्रोकको अग्रता सहित शीर्षस्थानमा छन्। आज उनले १-अन्डर ७१ खेले।

भारतका प्रिम्स बैंन्सला समग्रमा ५-ओभर १ सय ४९ सहित दोस्रो स्थानमा छन्। उनले आज २-ओभर ७४ को स्कोर निकाले। भारतकै अदभय बगला समग्रमा ८-ओभर १ सय ५२ सहित तेस्रो स्थानमा रहे। उनले आज ४-ओभर ७६ को स्कोर निकाले।

तीन दिने ५४-होलको प्रतिस्पर्धामा नेपाल सहित दक्षिण एसियाका बंगलादेश, भुटान, श्रीलंका र भारतका गरी ५ राष्ट्रका ५७ खेलाडीको सहभागिता छ।

यो प्रतियोगिता वर्ल्ड एमेच्योर गल्फ र्‍याङ्किङ (डब्लुएजीआर) द्वारा मान्यता प्राप्त हो। प्रतियोगितामा सहभागी पुरुष तथा महिला खेलाडीहरूले र्‍याङ्किङ अंक समेत प्राप्त गर्नेछन्।