ललितपुर (हाम्रो खेलकुद)- प्रथम बागमती प्रेसिडेण्ट स्क्वास कप २०८२ को उपाधि पुरुषतर्फ अर्हन्त केशर सिंह र महिला तर्फ विपना भ्लोनले जितेका छन्। 

सातदोबाटो स्थित नेपाल स्क्वास एकेडेमीमा शनिवार भएको फाइनल खेलमा शीर्ष खेलाडी अर्हन्तले पाँचौं वरियताका पासाङ्ग भ्लोनलाई ११-८, ११-९ र ११- ९ को स्कोरले पराजित गरे। राकेश परियार तेस्रो र प्रज्वल प्रधान चौथो भए ।

महिलातर्फकाे फाइनलमा शीर्ष वरीयताकी विपनाले दाेस्राे वरीयताकी स्वस्थानी श्रेष्ठलाई ११-५, ११-७ र ११-९ ले हराइन् ।अस्मिता नगरकोटी तेस्रो र साक्षी सुनुवार चौथो भइन् ।

पुरुष र महिला दुवै तर्फको विजेता १५, दोस्रोले १०, तेस्रोले ७ र चौथोले ४ हजार रुपैयाँ प्राप्त गरे। गर्ल्स जुनियर तर्फ रेनसा महर्जन पहिलो भइन् । रचना प्रजा दोस्रो, नियुक्ति श्रेष्ठ तेस्रो र प्रतिक्षा प्रजा चौथो भइन् ।

त्यस्तै, नवप्रवेशी (नोभिस) गर्ल्स विधा तर्फ डोल्मा तामाङ पहिलो, अलिशा प्रजा दोस्रो , आरोही महर्जन तेस्रो र दीपिका महत चौथो भइन् ।

नवप्रवेशी (नोभिस ) ब्वाइज समूहमा हेलिस घिसिङले पहिलो, रेजन महर्जन दोस्रो, स्वयम श्रेष्ठ तेस्रो र क्रिश श्रेष्ठ चौथो स्थान भए ।

बागमती प्रदेश सरकारका पूर्वमन्त्री मा. रामकृष्ण चित्रकारलगायतले विजयी खेलाडीलाई पुरस्कार वितरण गरे।