काठमाडौं (हाम्रो खेलकुद)- मार्भलस इंग्लिस बोर्डिङ स्कुलले २० औं अन्नपूर्ण दोस्रो राष्ट्रिय स्कुल चेस च्याम्पियनको उपाधि जितेको छ।

उमेर समूह यु ९, ११, १३ तथा १३  वर्ष माथिका छात्र र छात्रा बिच प्रतिस्पर्धा भएको प्रतियोगितामा मार्भलस ४५ अंक जोडेर च्याम्पियन बनेको हो ।

७५ स्कुलका ५ सय ५० विद्यार्थीको सहभागी रहेको प्रतियोगितामा मनकामना विद्यालयले ४० अंकका साथ दोस्रो भएकाे छ।  त्रियोग हाइस्कुलले ३८ अंक तेस्रो भयो।

ज्याठा स्थित अन्नपूर्ण स्कुलमा ४ दिन सम्म सञ्चालन भएको राष्ट्रिय प्रतियोगिताको १३ वर्ष माथिका छात्र समूहमा काठमाडौं प्रज्ञा कुञ्जका कशिभ कार्की  विजयी भए । उनले फाइनलमा भ्याली पब्लिक हाइ स्कुलका अनमोल राईलाई हराए। डिएभी स्कुलका हर्षवर्धन राठी तेस्रा भए । 

यसै समूह अन्तर्गत छात्रातर्फ मनकामनाकी प्रेसियस अधिकारी पहिलो, सूर्योदय सेकेन्डरी बोर्डिङ स्कुलकी अनन्य सैजु दोस्रो र काठमाडौं प्रज्ञाका नेलिसा ओझा तेस्रो भइन्।

छात्र यु १३ वर्ष मुनि एसियन पब्लिक स्कुलका दिपन मैनाली पहिलो , पाठशाला नेपाल फाउन्डेसनका ओस्कार पन्थी दोस्रो र मार्भलसका ब्रिज नन्दन झा तेस्रो भए।  

१३ वर्ष मुनि छात्रातर्फ मनकामनाकी मेघना अधिकारी विजयी भइन् । मेघनाले फाइनलमा नितिन मेमोरियलका परियचा बोलाखालाई‌ हराइन् । त्रियोगकी परिधि खत्रीले तेस्रो भइन् । यु ९ र ११ को सुरुवातको दुई दिनमै सकिएको थियो।

काठमाडौं महानगरपालिका वडा नम्बर २७ का वडा अध्यक्ष योगेश खड्का र अन्नपूर्ण स्कुलका प्रधानाध्यापक चन्द्रप्रकाश राजभण्डारीको विजेता खेलाडीलाई पुरस्कृत गरे। नेपाल बुद्धिचाल महासंघ र अन्नपूर्ण स्कूलले प्रतियोगिताको संयुक्त रुपमा आयोजना गरेका थिए।