हिमाल खरेल,बिर्तामोड

तेस्रो मिस्टर कञ्चनजंघा खुला शरीरिक सुगठन प्रतियोगिता भदौ अन्तिम साता हुने भएको छ । पहिलो र दोस्रो संस्करण प्रदेशस्तरीय भएको प्रतियोगिता यो संस्करणबाट राष्ट्रियस्तरको हुन लागेको हो ।

झापामा पहिलोपटक हुन लागेको राष्ट्रियस्तरको शारीरिक सुगठन प्रतियोगिता भदौ २७ र २८ गते बिर्तामोडमा हुने प्रतियोगिता संयोजक राम दाहालले मंगलवार पत्रकार सम्मेलनमा जानकारी दिए ।

पहिलो दिन प्रिजजिङ र दोस्रो दिन फाइनल प्रतिस्पर्धा हुने प्रतियोगितामा ५५ केजी, ६० केजी, ६५ केजी, ७० केजी, ७५ केजी र ७५ केजीभन्दा माथिका तौल समूहका खेलाडीहरू सहभागी हुने शारीरिक सुगठन संघका कोशी अध्यक्ष तथा प्रतियोगिताका अध्यक्ष आदित्य पराजुलीले बताए ।

बिर्तामोडको बडी ग्यारेजको आयोजनामा हुने प्रतियोगिताको विजेताले ५ लाख रुपैयाँ प्राप्त गर्नेछ । यसअघि विजेताको पुरस्कार ३ लाख ११ हजार १ सय ११ रुपैयाँ थियो ।

त्यस्तै, दोस्रो हुनेले ३ लाख रुपैयाँ, तेस्रो हुनेले २ लाख, चौथो हुनेले १ लाख रुपैयाँ पाउनेछ । पाँचौँ हुनेले ७५ हजार रुपैयाँ र छैटौँ हुनेले ५० हजार रुपैयाँ पाउने प्रतियोगिताका संयोजक दिपेन चौधरीले बताए ।

हरेक तौल समूहका दोस्रो हुने खेलाडीले ५ हजार र तेस्रो हुने खेलाडीले ३ हजार रुपैयाँ पाउनेछन् ।
प्रतियोगितामा देशभरबाट २ सयजना खेलाडीले सहभागिता जनाउने संयोजक दाहालले बताए । प्रतियोगिताको आयोजनामा ३५ लाख रुपैयाँ खर्च हुने अनुमान गरिएको छ ।

दोस्रो मिस्टर कञ्चनजंघा शरीरिक सुगठन प्रतियोगिताको उपाधि दिलिपकुमार चौधरीले जितेका थिए । डिएनपी फिटनेस गाईघाटका उनी ६५ केजी तौल समूहबाट सहभागी थिए ।

अघिल्लो संस्करणलाई कोशी प्रदेश खेलकुद विकास बोर्डले आयोजना गरेको थियो । बडी ग्यारेजले संयोजन गरेको सो प्रतियोगितालाई बोर्डले १५ लाख रुपैयाँ सहयोग गरेको थियो ।

झापाको बिर्तामोडमा भएको पत्रकार सम्मेलनमा प्रतियोगिताका सल्लाहकार सुवास भट्टराई, युवा व्यवसायी युवराज निरौला, पत्रकार सुब्रत न्यौपाने, झापा जिल्ला शारीरिक सुगठन संघका अध्यक्ष दिप साउदेनले शुभकामना व्यक्त गरेका थिए ।

सोही अवसरमा काठमाडौँमा हालै सम्पन्न प्रज्ञा स्मृति शारीरिक सुगठन प्रतियोगितामा पुरस्कार जित्ने बडी ग्यारेजका खेलाडी प्रेमराज राजवंशी, अभिषेक राजवंशी र हरीश राजवंशीलाई सम्मान गरिएको थियो ।