काठमाडौं (हाम्रो खेलकुद)- नेपाली सिएम पुरुषोत्तम सिलवालले द वेस्टर्न एसियन जुनियर चेस च्याम्पियनसिप मा द्रुत गतिको ब्लिट्जमा रजत पदक जितेका छन्।

श्रीलंकामा सम्पन्न द्रुत गतिको ब्लिट्जमा आठौं
वरियताका २१३० रेटेड पुरुषोत्तमले अन्तिम चरणमा प्रतियोगिताकै शीर्ष खेलाडी भारतका २३७९ उच्च रेटेड आइएम मायाङ्क चक्रवर्तीलाई पराजित गरेका थिए।

पुरुषोत्तमले ७ मध्ये ६ खेलमा‌ जित निकाले । उनले बंगलादेशका २१४२ रेटेड आइएम मनून रेजानिरसँगको खेल गुमाए । उनले ६ अंक २४.५ प्रोग्रेसिभ प्वाइन्ट जोडे ।

उज्वेकिस्तानका २१२० रेटेड एफएम अबु खाकिमोभ अकबरलिले ६ अंक प्रोग्रेसिभ २५.५ प्वाइन्ट जोडेर स्वर्ण पदक जितेका छन्। पुरुषोत्तमसँग पराजित भारतीय मायाङ्कले कास्य पदक प्राप्त गरे ।

विश्व बुद्धिचाल महासंघ तथा एसियन चेस फेडरेसनको तत्वावधानमा श्रीलंका चेस फेडरेसनले ४ जुनदेखि १२ जुनसम्म आयोजना गरेको द वेस्टर्न एसियन जुनियर चेस च्याम्पियनसिप भएको हो ।

नेपाल बुद्धिचाल महासंघका अनुसार प्रतियोगितामा आयोजक राष्ट्र श्रीलंका‌ सहित नेपाल, बंगलादेश, भारत, काजकिस्तान, माल्दिभ्स, रसिया, तुर्कमिनिस्तान र उज्वेकिस्तान गरि ९ राष्ट्र का ५९ खेलाडीको सहभागिता थियो।

यसअघि अन्तर्राष्ट्रिय बुद्धिचाल प्रतियोगिता अन्तर्गत सिंगापुरमा सम्पन्न फिडेको आधिकारिक प्रतियोगितामा रुपेश जैशवालले र्यापिडतर्फ रजत र ब्लिट्जमा कास्य पदक जितेका थिए । त्यसै कृष्ण थापाले नेपालमा भएको एसियन एमेच्योर च्याम्पियनसिपमा स्वर्ण पदक जितेका थिए।

पुरुषोत्तम नेसनल युथ च्याम्पियनसिपमा सहभागी हुन ता एसियन जुनियर र्यापिड च्याम्पियनसिप छोडेर आज स्वदेश फर्केका छन्। च्याम्पियन्सिप बिहीवार सुरु हुनेछ।
उनलाई त्रिभुवन अन्तर्राष्ट्रिय विमानस्थलमा महासंघका कोषाध्यक्ष ताराबहादुर रानाभाटले स्वागत गरे।