काठमाडौं (हाम्रो खेलकुद)- प्रथम जुनियर नेसनल चेस  च्याम्पियनसिपको छात्रातर्फ काठमाडौंकी रिया श्रेष्ठले एकल अग्रता लिएकी छिन् ।

बुढानिलकण्ठ नगरपालिकाको प्रायोजनमा जारी युवा प्रतियोगितामा रियाले ५ चरणको खेल सकिँदा ४.५ अंक जोडेर अग्रता बनाएकी हुन्। 

ओलम्पियाडमा छनोट भएकी रियाले नयुमा मगर, उज्जिभनी कँडेल, निहाना श्रेष्ठ र प्रेसियस अधिकारीलाई हराइन् । उनले विविशा तामाङसँग बराबरी खेलिन्। 

दोस्रो दिनको समाप्तिमा प्रेसियस, एन्जेल महर्जन, दानिशा पुरी र नेलिसा ओझा समान ४ अंकसहित प्राप्त ग संयुक्त रुपमा दोस्रो स्थानमा छन् ।

छात्रतर्फ ६ चरणको खेल सकिँदा रिसोन थापा र सिएम पुरुषोत्तम सिलवाल समान ६ अङकसहित संयुक्त रुपमा शीर्ष स्थानमा छन्।

आद्यान्त काफ्ले, प्रतिक सुवेदी, एआईएम अभिक शाह, अभिनभ पाण्डे, युनिक गौतम, स्वर्णिम दुवाल र खिमबहादुर पुन समान ५ अंकसहित संयुक्त रुपमा दोस्रो स्थानमा छन्।

प्रतियोगिता स्विस लिग क्लासिकल ६० मिनेट ३० सेकेन्ड इनक्रिजमेन्टका बाँकी चरणको खेलमा भोलि  रिसोन र पुरुषोत्तम सिलवाल, प्रतिक र अभिक, आद्यान्त र स्वर्णिम, खिम बहादुर र सतिशबीच हुनेछ ।

नेपाल बुद्धिचाल महासंघको तत्वावधान तथा बुढानीलकण्ठ युथ काउन्सिलको आयोजनामा चलिरहेको प्रतियोगिताका विजेता खेलाडीले कुल २ लाख ३० हजार रुपैयाँ पुरस्कार प्राप्त गर्नेछन्।

छात्र/ छात्रा समूहको विजेताले ४०, दोस्रोले २५, तेस्रोले १०, चौथोले ७ हजार ५ सय र पाँचौंले ५ हजार रुपैयाँ पुरस्कार प्राप्त गर्नेछन्।

यसैगरी ११० युवा खेलाडी मध्ये ८, १०, १२, १४, १६ र १८ वर्षका उत्कृष्ट खेलाडीले पनि नगद पुरस्कार प्राप्त गर्नेछन्।