काठमाडौं (हाम्रो खेलकुद) – झापाका रिसोन थापा र काठमाडौंकी रिया श्रेष्ठले प्रथम जुनियर राष्ट्रिय चेस च्याम्पियनसिपको उपाधि जितेका छन्।

बुढानीलकण्ठ नगरपालिकाको प्रायोजनमा शनिवार सम्पन्न च्याम्पियनसिपमा शतप्रतिशत सफलतासहित रिसोन छात्रतर्फ विजयी भएका हुन् । 

रिसोनले ९ चरणको खेलबाट ९ अङ्क प्राप्त गरे। श्रीलंकामा एसियाली चेसमा रजक पदक जितेर फर्केका सिएम पुरुषोत्तम सिलवालले ८ अङ्क जोडेर दोस्रा भए।

समान ७ अङ्क प्रोग्रेसिभ प्वाइन्टका आधारमा प्रतिक सुवेदी तेस्रो तस्रो र ललितपुरका अविक शाह चौथो भए । काठमाडौँका अग्रिम सैजुले पाँचौं स्थानमा प्राप्त गरे।

रिया अपराजित

जुनियर छात्रा तर्फ काठमाडौंकी रिया ७ चरणको खेलमा अपराजित रहने क्रममा ५ जित र २ बराबरी नतिजासँगै ६ अङ्कका साथ उपाधि जितिन् । 

बाँकेकी ईशा गिरीले ५.५ अङ्क टाइब्रेक ३३ प्वाइन्ट जोडेर दोस्रो भइन् । दक्षिणकाली नगरपालिकाका एन्जल महर्जनले समान ५.५ अङ्क टाइब्रेक ३१ प्वाइन्ट बनाउँदै तृतीय बन्न सफल भएकी छिन्।

काठमाडौंकी दानिसा पुरीले ५.५ अङ्क टाइब्रेक २७.५ प्वाइन्टमा चौथो र प्रिसियस अधिकारीले ५ अङ्क जोडेर पाँचौं भइन् ।

दुवैतर्फका विजेताले उपाधिसहित ४० हजार, दोस्रोले २५, तेस्रोले १० , चौथोले ७ हजार ५ सय र पाँचौंले ५ हजार रुपैयाँ प्राप्त गरे।

विधागततर्फ छात्र यु ८ काठमाडौंका शुभाङ्ग प्रधान, यु १० आस्विक पोखरेल, यु १२ समृद्ध श्रेष्ठ, यु १४ ओस्कार पन्थी ,यु १६ आद्यान्त काफ्ले र यू १८ युनिक गौतम उत्कृष्ट भए ।

छात्रातर्फ यु १० अग्रता आचार्य, यु १२ निहाना श्रेष्ठ, यु १४ नेलिसा ओझा, यु १६ ओजस्वी श्रेष्ठ र यू १८ ग्लोसी श्रेष्ठ उत्कृष्ट भए।

त्रिज्योति स्कुलमा कार्यक्रम संयोजक दीपक तामाङको सभापतित्वमा‌ भएको समापनमा बुढानिलकण्ठ नगरपालिकाका प्रमुख मिठाराम अधिकारी र नेपाल बुद्धिचाल महासंघका अध्यक्ष हेराकाजी महर्जनले विजेता खेलाडीलाई पुरस्कृत गरे।