काठमाडौं (हाम्रो खेलकुद)- मंगलादेवी सिंह स्मृति दोस्रो खुुल्ला फिडेे रेटिङ बुद्धिचाल प्रतियोगिताको तेस्रो दिन शुक्रवार सातौं चरणको खेल सकिँदा सम्म काठमाडौंका सिएम पुरुषोत्तम सिलवालले साढे छ अंक सहित एकल अग्रता लिएका छन् ।

छैटौं चरणको खेलमा फिडे मास्टर क्षितिज भण्डारी संग बराबरी खेलेका पुरुषोत्तमले सातौं चरणको खेलमा काठमाडौका खेलाडी जनार्दन श्रेष्ठलाई हराए।

एफएम क्षितिज भण्डारी , झापाका प्रकाशचन्द्र नेपाल र खोटाङका धिरेन राईले समान ६ अंकसहित संयुक्त रूपमा दोस्रो स्थानमा छन् ।

मकवानपुरका क्षितजले सातौं चरणको खेलमा काभ्रेका राहुल चौ प्रधानलाई हराए। प्रकाशले ललितपुरका सरोज महर्जन र पाँचथरका महेन्द्र साम्वाहम्फेलाई पराजित गरे।

धिरेनले छैटौं चरणमा पूर्व नेपाल च्याम्पियन नवीन तण्डुकारलाई र सातौ चरणमा सुरज महर्जनलाई हराए।
ज्याठा स्थित अन्नपूर्ण उच्च माविको सभा हलमा भइरहेको प्रतियोगितामा स्याङ्जाका सुशील सुवेदी साढे ५ अंक जोडेर तेस्रो स्थानमा छन् । उनले काठमाडौका राजकुमार राई र सर्लाहीका कमल श्रेष्ठलाई पराजित गरे।

काठमाडौँका सिएमए नवीन तण्डुकार, भगवती प्रसाद शर्मा, जनार्दन श्रेष्ठ, सन्देश श्रेष्ठ, काभ्रेका राहुल चौ  प्रधान, शैलेन्द्र न्यौपाने ,ललितपुरका सरोज महर्जन, झापाका रिसोन थापा र दोलखाका आशिष् फुयालको समान ५ अंक छ।

महिलातर्फ काठमाडौंकी रिया श्रेष्ठले ५ अंक जोडेर शिर्ष स्थानमा छिन् । जुनियर च्याम्पियन रियालाई पछ्याउँदै सर्लाहीका शान्ति धिमाल र काठमाडौँकी बिनिता कपाली समान ४ अंक सहित दोस्रो स्थानमा छन् ।

प्रतियोगिता काठमाडौ महानगरपालिका वडा नं २७ ले आयोजना गरेको हो।