काठमाडौं (हाम्रो खेलकुद)- युवा तथा खेलकुद मन्त्रालयले अर्को वर्ष जापानमा आयोजना हुने २० औं एसियाली खेलकुद (एसियाड) का लागि ३१ खेल दर्ता गराएको दाबी गरेको छ।

नेपाल ओलम्पिक कमिटी (एनओसी) ले आज पत्रकार सम्मेलन गरेर ३० खेल दर्ता गरेको जानकारी दिए केहि घन्टा नबित्दै ३१ खेल मन्त्रालयमार्फत दर्ता भएको दाबीसहित प्रेस विज्ञप्ति जारी गरेको हो।

मन्त्रालयले दर्ता गरेको भनिएको ३१ खेलमा एनओसीले दर्ता नगरेको ९ खेल सामेल छ। जसमा तेक्वान्दो, जिम्न्यास्टिक, इक्वेस्ट्रियन, फुटबल, फेन्सिङ, सुटिङ, ट्रायथलन, ह्यान्डबल, र रोइङ छन्।

एसियाड आयोजकलाई गरिएको विशेष अनुरोधपछि ३१ खेल दर्ता भैसकेको र आयोजकबाट पत्र समेत प्राप्त भएको मन्त्रालयको सचिवालयले हाम्रो खेलकुद डटकमसँग दाबी गरेको छ ।

यस विषयमा एनओसीका अध्यक्ष जीवनराम श्रेष्ठले खेल दर्ता एनओसी बाहेक कसैले पनि गर्न नसक्ने दाबी गरे। उनले मन्त्रालयले भ्रम फैलाएको आरोप समेत लगाएका छन्।

लामो समयदेखि विवाद गर्दै आएका खेलकुद मन्त्रालय र एनओसीको सहभागिताका विषय अर्को विवाद थपिएको छ।

मन्त्रालयले जारी गरेको विज्ञप्तिमा अवैध ठहर गरेको जीवन राम श्रेष्ठको नेतृत्वमा रहेको एनओसीले गरेको कुनै पनि कार्यलाई वैध मान्न नसक्ने भन्दै गम्भीर ध्यानाकर्षण भएको पनि उल्लेख गरिएको छ।

आयोजक समिति ओलम्पिक काउन्सिल अफ एसिया (ओसिए) बाट कुनै आधिकारिक पत्र प्राप्त नभइसकेको अवस्थामा अवैध एनओसीबाट गरिएको कुनै पनि पत्राचारलाई सरकारी मान्यता दिन नमिल्ने पनि विज्ञप्तिमा भनिएको छ।

खेलकुद मन्त्रालयले एसियाडका लागि दर्ता भएको दाबी गरेको खेल
एथलेटिक्स, बक्सिङ, क्रिकेट, तेक्वान्दो, कबड्डी, कराते, इ-स्पर्ट्स, उसु, जिम्न्यास्टिक, पौडी, जुडो, टेबल टेनिस, भलिबल, साइकलिङ, इक्वेस्ट्रियन, फुटबल, फेन्सिङ, गल्फ, सुटिङ, टेनिस, ट्रायथलन, भारोत्तोलन, कुस्ती, बास्केटबल, ब्याडमिन्टन, हकी, सफ्ट टेनिस, ह्यान्डबल, स्क्वास, रग्बी, रोइङ

एसियाडका लागि एनओसीमार्फत दर्ता भएका खेल

एथलेटिक्स, आर्चरी, ब्याडमिन्टन, बास्केटबल, बक्सिङ, ब्रेकिङ एण्ड डान्स स्पोर्टस, बेसबल एण्ड सफ्टबल, राफ्टिङ एण्ड कनोइङ, कुराँस, क्रिकेट, साइक्लिङ, इ-स्पोर्टस, गल्फ, हकी, जुडो, कबड्डी, कराते, मोडर्न पेन्टाथलन, रग्बी, स्केटिङ, स्पोर्टस क्लाइम्बिङ्ग, स्कावस, सफ्ट टेनिस, पौडी, टेनिस, टेबल टेनिस, भलिबल, भारतोलन, कुस्ती, उसु