काठमाडौं (हाम्रो खेलकुद)– इन्डोनेसियामा हुने एसियाली खेलकुदमा नेपालको सहभागी संख्याको अझै टुंगो लागि नसकेपनि एउटा चिनियाँ कम्पनीले नेपाली खेलाडी र अफिसियलका लागि खेल पोसाक प्रायोजन गरेको छ । इन्डोनेसियाको जाकार्तामा सेप्टेम्बरमा १८ औं एसियाली खेलकुद आयोजना हुँदैछ ।

स्पोर्टस वेयरको विक्रेता रहेको चिनियाँ कम्पनीले एजिलिटी र नेपाल ओलम्पिक कमिटी (एनओसी) बीच प्रायोजन सम्झौतामा हस्ताक्षर भएको छ । एनओसीका अध्यक्ष जीवनराम श्रेष्ठ र एजिलिटी हेन्ड एन्ड वेलनेस कर्पोरेसनका सहायक सिइओ स्टेवार्ट चेओङले सम्झौता पत्रमा हस्ताक्षर गरेका थिए ।

एजिलिटीले ४ सय सेट खेल सामाग्री उपलब्ध गराउने छ । सेटमा ट्रयाकसुट, हाफ पेन्ट, राउन्ड नेक टिसर्ट, पोलो टि सर्ट, स्पोर्टस जुत्ता, मोजा, क्याप र स्पोर्टस् ब्याग १/१ थान रहेने सम्झौता पत्रमा उल्लेख छ । सो अवसरमा एनओसी अध्यक्ष श्रेष्ठले एजिलिटीलाई धन्यवाद दिए । एजिलिटीका चेओङले व्यापारिक प्रायोजनलाई नहेरी नेपाली खेलकुदलाई सहयोग गर्ने उद्देश्यका साथ प्रायोजन गरेको बताए ।

राष्ट्रिय खेलकुद परिषद् (राखेप) ले अहिले सम्म कति खेल, खेलाडी र अफिसियलले एसियाडमा भाग लिने भन्ने आधिकारिक निर्णय सार्वजनिक गरेको छैन । राखेप उपाध्यक्ष लामा टेन्डी शेर्पाको नेतृत्वमा उच्चस्तरीय समिति गठन भएपनि समितिले खेल संख्या र खेलाडीको संख्या सिफारिस गरे नगरेको कुनै जानकारी सार्वजनिक भएको छैन । अनौपचारिक रुपमा नेपालले २६ खेलमा एसियाडमा प्रतिस्पर्धा निर्णय भएको बताइएको छ ।