काठमाडौ (हाम्रो खेलकुद)– महिला भलिबलका दुई चर्चित क्लब शिवम् न्यु डायमण्ड र नेपाल एपिएफ क्लबबीच चौथो आरबीबी एनभिए राष्ट्रिय महिला क्लब लिग भलिबल च्याम्पियनसिपको उपाधि भिडन्त पक्का भएको छ । लिगको अन्तिम चारमा तीन विभागिय टोली र न्यु डायमण्ड पुगेका थिए ।

शुक्रबार भएको सेमिफाइनलमा न्यु डायमण्डले नेपाल पुलिस क्लबलाई ३–१ को सेटमा पराजित गर्दै एपिएफसँगको उपाधि भिडन्त पक्का गरेको हो । सेमिफाइनलमा पराजित गरेसँगै डायमण्डले लिग चरणको पहिलो खेलमा बेहोरेको ३–१ को हारको बदला लिएको छ ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको खेलमा न्यु डायमण्डले पहिलो सेट २५–१७ ले आफ्नो पक्षमा पारेको थियो । दोस्रो सेट २५–१८ ले सहजै जितेपनि डायमण्डले तेस्रो सेट ११–२५ ले गुमाउन पुगेको थियो । तर, चौथो सेटमा उत्कृष्ट प्रदर्शन गर्दै डायमण्डले २५–१५ को सहज जित निकाल्यो ।

शुक्रबारै भएको पहिलो सेमिफाइनलमा एपिएफले त्रिभुवन आर्मी क्लबमाथि ३–० को सहज जित निकाल्न सफल भयो । एपिएफलेलो आर्मीलाई २५–१२, २५–२२ र २५–१५ को सहज जित निकाल्यो ।

न्यु डायमन्ड र एपिएफबीच शनिबार २ बजे फाइनल हुने आयोजक नेपाल भलिबल संघले जनाएको छ । त्यसअघि दिनको १२ बजे तेस्रो स्थानो लागि आर्मी र पुलिसबीच प्रतिस्पर्धा हुनेछ । लिग चरणको अन्तिम खेलमा एपिएफलाई पराजित गर्दै एपिएफको विजयी यात्रामा पूर्णविराम लगाएको डायमण्ड शुक्रबार सोही नतिजालाई दोहो¥याउने लक्ष्यमा रहदै सिजनको पहिलो उपाधि जित्ने अभियानमा हुनेछ ।

गत माघमा आफैले आयोजना गरेको शिवम् न्यु डायमण्ड कप जितेयता न्यु डायमण्ड उपाधिविहीन छ । यता एपिएफले भने त्यसपछिको ६ प्रतियोगिताको उपाधि जित्न सफल भएको छ । एपिएफ लिग चरणमा बेहोरेको हारको बदला लिदै यो सिजनको तेस्रो उपाधि जित्ने लक्ष्यमा हुनेछ ।

नेपाल भलिबल संघको आयोजना तथा राष्ट्रिय बाणिज्य बैंकको मुख्य प्रायोजनमा सञ्चालन भएको प्रतियोगितामा ६ टिमले राउण्ड रोबिन लिगका आधारमा प्रतिस्पर्धा गरेका थिए । राउन्ड रोविन लिगका शीर्ष ४ टोली सेमिफाइनलमा पुगेका थिए ।

जेठ २१ गतेबाट शुरु भएको प्रतियोगिताको विजेताले २ लाख रुपैया प्राप्त गर्नेछ । उपविजेताले १ लाख तथा तेश्रो र चौथो हुने टिमले क्रमशः ५० हजार र २५ हजार रुपैयाँ पाउनेछन् । प्रतियोगिताको सर्वोत्कृष्ट खेलाडीले २५ हजार रुपैयाँ प्राप्त गर्नेछिन् । त्यस्तै बिधागततर्फका उत्कृष्ट स्पाईकर, सेटर, ब्लकर, सर्भर, डिफेन्टर र बेष्ट कोचले जनहि ५ हजार रुपैयाँ प्राप्त गर्नेछन् ।