काठमाडौं (हाम्रो खेलकुद)– नेपालले दुई वर्षपछि जापानमा हुने टोकियो ओलम्पिकमा ९ खेललाई विशेष प्रथामिकतामा राख्दै तयारी सुरु गर्ने बताएको छ । पदकको आशा गरिएका खेललाई विशेष तयारीमा राखिने शुक्रबार सातदोबाटोस्थित नेपाल ओलम्पिक कमिटी (एनओसी) मुख्यालयमा आयोजित पत्रकार सम्मेलनमा एनओसीका अध्यक्ष जीवनराम श्रेष्ठले जानकारी दिए ।

ओलम्पिक सोलिडारिटी कोर्स अन्तर्गत नेपालले जुडो, तेक्वान्दो, बक्सिङ, कराते, आर्चरी, एथलेटिक्स, सुटिङ, भारोत्तोलन र स्वीमिङलाई प्राथमिकतामा राखेको जनाएको छ । श्रेष्ठ एक दशकभन्दा अघि राष्ट्रिय खेलकुद परिषद् (राखेप) सदस्य सचिव हुँदा २०२० को ओलम्पिकमा स्वर्ण पदक जित्ने लक्ष्यसहित भिजन ट्वान्टी ट्वान्टी सार्वजनिक गरिएको थियो ।

तर, उनकै कार्याकाल वा त्यसपछिका सदस्य सचिवको कार्यकालमा पनि त्यो भिजन अनुसार कुनै काम अघि बढेन । टोकियो ओलम्पिकलाई एनओसीले ओलम्पिक सोलिडारिटीमा परेका ९ खेलबाट २ देखि ४ खेलाडीलाई बिशेष तयारीका लागि वैदेशिक प्रशिक्षणमा पठाउने जनाइएको छ । सोही कोर्ष अनुसार जुडोकी फुपूल्हामु खत्री प्रशिक्षकका लागि जापान गइसकेकी छिन् ।

जुडोकै मनिता शाही भदौंमा आयोजना हुने एसियाली खेलकुद पछि त्यसतर्फ जाने बताइएको छ । तेक्वान्दो र एथलेटिक्सका खेलाडीलाई पनि केहि समय पछि वैदेशिक प्रशिक्षणमा पठाइने एनओसीले जनाएको छ । सन् २०१६ को रियो ओलम्पिक सकिएको लगत्तै टोकियो ओलम्पिकको तयारी सुरु गर्ने भनिए पनि अनेक कारणले सम्भव नभएको एनओसी अध्यक्ष श्रेष्ठले बताए ।