काठमाडौं (हाम्रो खेलकुद) – विभागीय नेपाल एपिएफ क्लबका दिपेश धामी पुरुष एकलतर्फ र पाकिस्तानकी साजाद माहुर महिला एकलतर्फ अन्नपुर्ण अन्तर्राष्ट्रिय ब्याडमिन्टन प्रतियोगितामा च्याम्पियन बनेका छन् ।

त्रिपुरेश्वस्थित राष्ट्रिय खेलकुद परिषद (राखेप) कभर्डहलमा शनिबार भएको खेलमा पुरुष एकलतर्फको फाइनलमा एपिएफका दिपेशले सिल्कका प्रिन्स दाहाललाई २१–११ र २१–१० को सोझो सेटमा पराजित गरे । बंगलादेशका मोहम्मद सलमान खान र आर्मीका प्रिन्स दाहाल तेस्रो भए ।

महिला एकलतर्फको फाइनलमा पाकिस्तानकी साजाद माहुरले त्रिभुवन आर्मी क्लबकी रसिला महर्जनमाथि २१–१५ र २१–१० को सहज जित निकालिन् । अघिल्लो संस्करणकी विजेता आर्मीकी नङ्सलदेवी तामाङ र अमिता गिरी तेस्रो भइन् ।

मिक्स डबल्समा एपिएफका दिपेश धामी र पुजा श्रेष्ठको जोडी च्याम्पियन बन्यो । दिपेश र पुजाकोे जोडीले आर्मीका प्रफुल महर्जन र नङ्सलदेवी तामाङको जोडीलाई २२–२० र २१–१७ ले पराजित गर्यो ।

पुरुष डबल्समा भारत आसामका जुम्ल्याहा दाजुभाई रानाजन बुरागोहाई र अनाजन बुरागोहाईको जोडी च्याम्पिन बन्यो । बुरागोहाईको जोडीले एपिएफका दिपेश र विजित थापामगरको जोडीलाई २१–१९ र २१–१६ को सहज सेटमा पाखा लयो ।

पुरुष यु–१९ एकलमा सिल्कका प्रिन्स दाहाले च्याम्पियन बने । उनले आर्मीका प्रफुल महर्जनमाथि २१–१५ र २१–१९ को सहज जित निकाले ।रुकेश महर्जन र पविन लिङथेप तेस्रो भए । महिला यु–१९ एकलमा आर्मीकी रसिला महर्जन च्याम्पियन बनिन् । उनले नेपाल पुलिस क्लबकी जेसिका गुरुङमाथि २१–१९ र २१–१९ को जित निकाल्न सफल भईन् ।

जुनियरतर्फ महिला र पुरुष एकल तर्फका विजेताबाहेक अन्य स्पर्धाका विजेताले दुई तोला, उपविजेताले एक तोला र तेस्रो हुने खेलाडीले आधा तोला सुन पुरस्कार प्राप्त गरे । जुनियरतर्फ महिला तथा पुरुष सिंगल्सका विजेताले भने एक तोला, दोस्रो हुनेले आधा तोला र तेस्रो स्थान हासिल गर्नेले चार आना सुन पुरस्कार प्रदान गरिएको थियो ।

विजेतालाई राष्ट्रिय खेलकुद परिषद्का सदस्य–सचिव केशवकुमार विष्टलगायतले एक कार्यक्रमबीच पुरस्कृत गरे । पाँच दिनसम्म सञ्चालन भएको प्रतियोगितामा विभिन्न १० स्पर्धामा प्रतिस्पर्धा भएको थियो ।