काठमाडौं (हाम्रो खेलकुद) – दोस्रो नेपाल स्ट्रोङगेस्ट सुनिल लाल जोशी मेमोरियल भारोत्तोलन कम्पिटिसन अर्काे साता ललितपुरमा हुने भएको छ । काठमाडौं जिल्ला भारोत्तोलन संघले बुधबार राजधानीमा पत्रकार सम्मेलनको आयोजना गर्दै दोस्रो संस्करणको दोस्रो नेपाल स्ट्रोङगेस्ट सुनिल लाल जोशी मेमोरियल भारोत्तोलन च्याम्पियनसिज असोज १७ र १८ गते दुई दिन ललितपुरमा हुने जानकारी गराएको हो ।

राष्ट्रिय स्तरको प्रतियोगितामा तीन विभागीय टोली र जिल्लाका खेलाडीहरुको सहभागिता रहनेछ । प्रतियोगितामा सिनियर र जुनियरमा गरी ३० वटा तौल समूहमा करिव १ सय जना खेलाडीले प्रतिस्पर्धा गर्नै काठमाडौं जिल्ला भारोत्तोलन संघका अध्यक्ष विजेन्द्र विक्रम शाहले पत्रकार सम्मेलनमा जानकारी गराए ।

पुरुषतर्फ ५६, ६२, ६९, ७७, ८५, ९४, १०५ र १०५ केजीभन्दा माथि प्रतिस्पर्धा हुनेछ । महिलातर्फ ४८, ५३, ५८, ६३, ६९, ७५ र ७५ केजीभन्दा माथि प्रतिस्पर्धा हुनेछ । कम्पिटिसन अग्नि ब्याङ्क्वेट कुमारीपाटी ललितपुरमा हुनेछ । प्रतियोगितामा सबैभन्दा बढी भार उठाउने खेलाडीले दोस्रो नेपाल स्ट्रोङगेस्ट पुरुष–२०१८ को उपाधिसहित नगद प्राप्त गर्नेछ ।

महिलातर्फ पनि सबैभन्दा बढी भार उठाउने खेलाडीले दोस्रो नेपाल स्ट्रोङगेस्ट महिलाको उपाधि जित्नेछ । यस्तै प्रतियोगिताको सिनियरतर्फ उत्कृष्ट हुने पुरुष खेलाडीले बेस्ट लिफ्टरको उपाधि जित्नेछ । महिलातर्फ पनि उत्कृष्ट खेलाडीलाई बेस्ट लिफ्टरको उपाधि जित्नेछ । अन्य तौल समूहको विजेताले पनि पुरस्कार प्राप्त गर्नेछ । राष्ट्रिय कीर्तिमान बनाउने खेलाडी नगदसहित पुरस्कृत हुनेछ ।

जुनियरतर्फको पनि उत्कृष्ट पुरुष र महिला खेलाडीले बेस्ट लिफ्टरको उपाधि जित्नेछ । उदियमान महिला तथा पुरुष खेलाडी पुरस्कृत हुने आयोजकले जनाएको छ । प्रतियोगिता सञ्चालनको लागि करिव ५ लाख खर्च हुने आयोजकले अनुमान गरेको छ ।

नेपाल भारोत्तोलन संघ, राष्ट्रिय खेलकुद परिषदबाट सहयोग जुटेको र अपुगर रकम प्रायोजकहरुबाट पुरा गरिने अध्यक्ष विजेन्द्र विक्रम शाहीले जानकारी गराए । भारोत्तोलन खेलबाट सुनिलले थुपै्र अन्तर्राष्ट्रिय पदक दिलाएका थिए । भारोत्तोलनको पूर्वप्रशिक्षक समेत रहेका सुनिल लाल जोशीको २०७४ असार ११ गते ५२ वर्षको उमेरमा उपचारको क्रममा निधन भएको थियो ।