अर्जुन कार्की
बागलुङ– नेपालको राष्ट्रिय खेल हो भलिबल । बागलुङ जिल्लामा अरु खेल भन्दा भलिबल नै धेरैको रोजाईमा पर्ने गर्दछ । भौगोलिक बनोट र कम लगानीमा खेलन सकिने भएकाले ग्रामिण भेगमा भलिबल अहिले पनि लोकप्रिय खेलमा पर्दछ । जिल्लामा हुने मेला, महोत्सव चाडपर्वमा हुने कार्यक्रममा पनि भलिबल मुख्य आकर्षण हुने गरेको छ ।

फाइल तस्बिर

जिल्लामा भलिबलको क्रेज छ, तर यहाँ खेलाडीले आफ्नो दायरालार्ई जिल्ला भन्दा माथि लान सकेका छैनन् । यहाँका थोरै खेलाडीले भलिबलमार्फत परिचय बनाएका छन् । तर, त्यो पनि सोचे अनुरुप छैन । बागलुङमा पुरुषको दाँजोमा महिला प्रतियोगिता कम हुने गरेको छ । महिला भलिबल पनि जिल्लामा रुचाईएपनि पुरुषको जस्तो प्रतियोगिता आयोजना हुँदैन ।

यस्तो पृष्ठभूमि रहेको बागलुङमा राष्ट्रिय महिला भलिबल प्रतियोगिता आयोजना हुन लागेको छ । नेपाल भलिबल संघले प्रत्येक वर्ष आयोजना गर्दै आएको महिला राष्ट्रिय भलिबल प्रतियोगिताको २२ औं संस्करण असोज २३ गतेदेखि २७ गतेसम्म बागलुङको गल्कोटमा आयोजना हुँदैछ ।
महिला भलिबल आयोजनाले जिल्लामा भलिबलको तत्कालिन क्रेजलाई त अवश्य पनि बढाउने छ ।

तर, त्यो प्रतियोगिताले जिल्लामा लामो समय सम्म प्रभाव पार्न सक्छ की सक्दैन त्यो भने केहि समय कुर्नुपर्ने हुन्छ । जिल्ला भलिबल संघ बागलुङको आयोजनामा हुने प्रतियोगिता नेपाल भलिबल संघको सहयोग र गल्कोट नगरपालिकाको आर्थिक सहयोग हुन लागेको हो । प्रतियोगितामा ७ प्रदेश र ३ विभागिय गरि १० टोलीको सहभागिता रहनेछ ।

राष्ट्रिय महिला भलिबल आयोजना बागलुङका लागि अवसर र चुनौती यस्तो हुन सक्दछ ।

अवसर
१. भलिबलको लोकप्रियतामा बृद्धि- अन्य खेलको तुलनामा भलिबलप्रति क्रेज छ । यो प्रतियोगिताले भलिबलको लोकप्रियतालार्ई अझै बढाउने अपेक्षा गरिएको छ ।
२.खेलकुदका माध्यमबाट जिल्लाको प्रचार – यो प्रतियोगिता भने जिल्लाको खेलकुदको प्रचारप्रसारमा सहयोग पुग्ने आशा गर्न सकिन्छ । राष्ट्रिय महिला टोली निर्माणका लागि खेलाडी छनोटका रुपमा समेत यो प्रतियोगिता रहेकोले पनि धेरैको ध्यान यसले तानेको छ ।
३. खेलाडी उत्पादनको सम्भावना- महिला भलिबल प्रतियोगिता आयोजनाले बागलुङमा आउने दिनमा महिला खेलाडी उत्पादका लागि प्रेरणा मिल्न सक्नेछ ।

चुनौती 
१. व्यवस्थापन- भौतिक पूर्वाधार नेपाली खेलकुद आयोजनाका लागि ठूलो चुनौति हुने गरेको छ । त्यो संगै व्यवस्थापन पनि त्यत्तिकै चुनौतिको विषय रहँदै आएको छ । महिला प्रतियोगितामा पहिलो पट १० टोलीले सहभागिता जनाउँदैछन् । यसअघि क्षेत्रका ५ र विभागका ३ टोली गरि ८ टोलीले प्रतिस्पर्धा गर्थे ।

देश संघियतामा गइसकेकपछि पहिलो पटक ७ प्रदेश र ३ विभाग गरि १० टोलीले प्रतिस्पर्धा गर्नेछन् । विगतमा भन्दा टोलीको संख्या बढेकाले बागलुङ जिल्ला संघलाई व्यवस्थापनको चुनौती हुन सक्दछ । सडक यातायातको सुविधा राम्रो नहुँदा पनि खेलाडीलाई आयोजना स्थल सम्म पुर्याउने केहि कठिनार्य हुन सक्दछ । सहभागी टोलीको बसोबास मिलाउन पनि संघलाई चुनौती हुन सक्दछ ।

२. आर्थिक – प्रतियोगिता आयोजनाका लागि २० लाख रुपैयाँ खर्च हुने अनुमान गरिएको छ। नेपाल भलिबल संघले प्रतियोगिताका लागि १ लाख रुपैयाँ दिएको छ । गल्कोट नगरपाकिलको ८ लाख रुपैयाँ छुटाएको छ भने बाँकी रकम जिल्ला संघले जुटाउनु पर्नेछ । त्यो सहज पक्कै हुने छैन । प्रतियोगिता आयोजना पछि हिसाब सार्वजनिक गर्ने परम्परा नभएका कारण पनि आर्थिक सहयोग जुटाउन पहिलाको तुलनामा जिल्लामा कठिन हुँदै गएको छ ।