काठमाडौं (हाम्रो खेलकुद)– नेपाली नम्बर एक ब्याडमिन्टन खेलाडी रत्नजित तामाङ बंगलादेशमा आजबाट सुरु भएको योनेक्स सनराईज बंगलादेश अन्तराष्ट्रिय च्यालेन्ज–२०१८ को दोस्रो चरणमा प्रवेश गरेका छन् ।

रत्नजित तामाङ । फाइल तस्बिर

मगंगलबार भएको पुरुष एकलतर्फको खेलमा रत्नजितले भारतका अङकुर साङपाङ राईलाई २–० को सोझो सेटमा पराजित गर्दै दोस्रो चरणमा प्रवेश गरेका हुन् । रत्नजितले भारतीय खेलाडीमाथि पहिलो सेटमा २१–११ को सहज जित निकाले थिए ।

प्रतिस्पर्धात्मक बनेको दोस्रो दोस्रो सेटमा रत्नजितले २५–२३ को संघर्षपूर्ण जित निकाले । अब उनले मलेसियाका जुल्हेल्मी जुल्किफ्लीसँग प्रतिस्पर्धा गर्नेछन् ।

अर्का खेलाडी दीपेश धामी भने पराजित भएका छन् । दीपेश इन्डोनेसियाका क्रिष्टियन एडिनाटासँग २१–१८ र २१–१३ ले पराजित भएको टिम ब्यवस्थापक सुभाष श्रेष्ठले बंगलादेशबाट जानकारी दिएका छन् ।

पुरुष जोडीमा भने रत्नजित र दिपेशको जोडी वाक ओभर प्राप्त गर्दै दोस्रो चरणमा प्रवेश गरेका छन् । यस्तै महिला जोडीमा पनि नङ्सल देवी तामाङ र अमिता गिरीको जोडीले मरिससका खेलाडीबाट वाक ओभर प्राप्त गर्दै क्वार्टरफाईनल यात्रा तय गरेको छ ।

मिश्रित जोडीतर्फ दिपेश र अमिताको जोडी मरिससका खेलाडीबाट वाक ओभर प्राप्त गर्दै दोश्रो चरण प्रवेश गरेको छ ।