काठमाडौं (हाम्रो खेलकुद) – नेपाल तेक्वान्दो संघले जापानको टोकियोमा सन् २०२० मा हुने ओलम्पिक खेलकुदका लागि ३ पुरुष र २ महिला खेलाडीको प्रारम्भिक छनोट गरेको छ ।
सातदोबाटोस्थित तेक्वान्दो एकेडेमीमा भएको छनोट प्रतियोगिताबाट आ–आफ्नो स्पर्धामा पहिलो भएका खेलाडीको प्रारम्भिक छनोट गरिएको तेक्वान्दो संघका प्रवक्ता दिपक विष्टले जनाएका छन् । छनोटमा नेपाल प्रहरी क्लबका खेलाडीको वर्चस्व रह्यो । ५ मध्ये प्रहरीका ४ खेलाडी प्रारम्भिक छनोटमा परे । बाँकी १ खेलाडी त्रिभुवन आर्मी क्लबका खेलाडी हुन् ।
पुरुष ५८ केजीमुनि पुलिसका मनोज मल्ल पहिलो भए । फाइनलमा उनले आर्मीका सागर गुभाजुलाई २३–१६ ले पराजित गरे । ६८ केजीमुनि पुलिसका वीरबहादुर महरा पहिलो भए । उनले फाइनलमा एपीएफ क्लबका उमेश राजभण्डारीलाई ३३–१२ ले हराए ।
८० केजीमुनि फाइनलमा प्रहरीका निश्चलमान श्रेष्ठले आर्मीका रामहरि महतको चुनौती १४–१० ले समाप्त पारे । महिला ४९ केजीमुनि आर्मीकी युनिशा राई पहिलो भइन् । युनिशाले फाइनलमा एपीएफकी अस्मिता खड्कालाई २८–२० ले निराश पारिन् ।
५७ केजीमुनि प्रहरीकी निमा गुरुङले आर्मीकी रेश्मा थापामाथि २०–८ को जित निकाल्दै पहिलो भइन् । एकदिने छनोटअन्तर्गत पुरुषमा ३ स्पर्धामा ३५ तथा महिलामा २ स्पर्धामा १३ खेलाडीले प्रतिस्पर्धा गरेको तेक्वान्दो मुख्य सहायक प्रशिक्षक नवीनकुमार श्रेष्ठले जनाएका छन् ।
