काठमाडौं(हाम्रो खेलकुद)- त्रिभुवन आर्मी क्लबकी स्वेच्छा नेम्वाङले दोश्रो सम्झना कप राष्ट्रिय खुला टेबलटेनिस प्रतियोगिताको महिलातर्फको सेमिफाइनलमा नेपाल च्याम्पियन तथा नेपाल पुलिस क्लबकी नविता श्रेष्ठसँग प्रतिस्पर्धा गर्ने भएको छ ।
अर्काे सेमिफाइनलमा दीक्षा तामाङले रविना महर्जन विरुद्ध प्रतिस्पर्धा गर्ने भएका छन् । नविता नेपाल प्रहरीकी हुन् भने बाँकी तीनै नेपाल आर्मीमा आबद्ध छन् । प्रतियोगिताअन्तर्गत स्कुलतर्फ यु–१२ ब्वाइज सिंगल्स फाइनलमा पुष्पसदनका सिद्धार्थ तामाङले जनकनाथका दिपेश गुरुङलाई ११–६, ११–७ र ११–५ को सोझो सेटमा पराजित गरे ।
यु–१६ ब्वाइज सिंगल्समा होराइजनका प्रवेश बस्नेत पहिलो भए । उनले फाइनलमा आदर्श विद्या मन्दिर (एभीएम) का विशाल गोलेलाई ११–५, १२–१० र १३–११ ले हराए । कलेजतर्फ सिंगल्स स्पर्धाको पुरुषमा सोफ्ट वारिकाका स्यान्टु श्रेष्ठ तथा महिलामा लिभरपुलकी सिक्का सुवाल पहिलो बने ।
स्यान्टुले टाइम्सका कृष्ण थापा मगरलाई ११–१, ११–५ र ११–६ तथा सिक्काले एम्सकी दीक्षा दाहाललाई ९–११, ११–६, ११–३ र ११–८ ले उपाधि भिडन्तमा पाखा लगाए ।
