काठमाडौ (हम्रो खेलकुद ) – घरेलु महिला भलिबलका दुई महारथी विभागीय नेपाल एपीएफ क्लब र होङग्वान्जी न्यु डायमन्ड एकेडेमी छैटौं सशस्त्र प्रहरी महानिरीक्षक राष्ट्रिय खुुल्ला महिला भलिबल प्रतियोगिताको उपाधिका लागि प्रतिस्पर्धा गर्ने भएका छन् ।
हल्चोकस्थित एपीएफ क्लबको भलिबल कोर्टमा बिहीबा भएको सेमिफाइनलमा एपीएफले अर्काे विभागीय टोली नेपाल पुलिस क्लबलाइ तथा होङग्वान्जी न्यु डायमन्ड एकेडेमीले विभागीय टोली त्रिभुवन आर्मी क्लबलाई नै पराजित गर्दै उपाधि भेट पक्का गरेको हो । फाइनल खेल शनिबार हुनेछ ।
एपीएफ क्लबको कोर्टमा साविकको विजेता समेत रहेको एपीएफले नेपाल पुलिस क्लबमाथि ३–१ को जित निकाल्यो । एपीएफले पहिलो र दोस्रो सेट २५–२३ र २५–१७ जितेपनि तेस्रो सेट १८–२५ ले गुमायो तर, चौथो सेटमा एपीएफ २५–१२ ले विजयी हुदै प्रतियोगितामा लगातार छैटौपटक फाइनलमा पुग्न सफल भयो ।
यस्तै लगातार छैटौपटक फाइनलमा प्रवेश गर्ने क्रममा न्यु डायमन्डले त्रिभुवन आर्मी क्लवलाई ३–१ को सेटमा पराजित गर्दै उपाधिका लागि एपीएफसँगको भेट पक्का ग¥यो ।
रोमाञ्चक बनेको खेलको पहिलो सेट डायमन्डले २५–२३ ले आफ्नो पक्षमा पारेको थियो । तर, दोस्रो सेट २३–२५ ले गुमाएपछि खेल १–१ को रोमाञ्चक मोडमा पुगेको थियो । तर, त्यसपछिको दुवै सेट डायमन्डले २५–२१ र २५–२० ले आफ्नो पक्षमा बनायो ।
प्रतियोगिताको ५ संस्करणमध्ये चार संस्करणमा आयोजक एपीएफ च्याम्पियन बनेको छ । डायमन्ड चौथो संस्करणमा च्याम्पियन बनेको थियो ।
अब एपीएफ यो वर्ष १०औं उपाधि जित्ने लक्ष्यमा हुनेछ । न्यु डायमन्ड एपीएफको उपाधि यात्रालाई रोक्दै वर्षको पहिलो उपाधि जित्ने लक्ष्यमा हुनेछ ।
