दिपक बोहोरा
पाँचथर – प्रदेश १ सरकारले खेलकुदका लागि ४७ करोड भन्दा बढीको बजेट विनियोगन गरेको छ । आर्थिक मामिला तथा योजना मन्त्री इन्द्र आङबोले आर्थिक वर्ष २०७६/०७७ का लागि बजेट प्रस्तुत गर्ने क्रममा खेलकुदका लागि ४७ करोड ५५ लाख रुपैयाँको बजेट नियोजन गरेका हुन् ।
प्रदेश सरकारले खेलकुदलाई विकास र बिस्तार गर्नको लागी खेलकुद बोर्ड गठन गर्ने योजना अगाडि सारेको छ । एक स्थानिय तह एक खेलमैदान निर्माण गर्नको लागी ३६ करोड ६० लाख रुपैयाँ प्रदेश सरकारले विनियोजन गरेको छ ।
धरान उप महानगरपालिकालाई खेलकुद ग्रामको रुपमा बिकास गर्नको लागी ५ करोड छुट्टाइएको छ । विराटनगरको सहिद मैदानमा फ्लडलाईटका लागि ५ करोड रुपैयाँ प्रदेश सरकारले विनोयोजन गरेको छ । सहिद मैदानमा रात्री फुटबल यसअघि सञ्चालन भइसकेको छ । त्यहाँको फ्लडलाइटको स्तर उन्नती हुने अपेक्षा गरिएको छ ।
इटहरी रङशालालाई प्रादेशिक रंगशाला र बैजनाथपुर अन्तराष्ट्रिय क्रिकेट मैदानमो रुपमा विकास गर्ने प्रदेश सरकारले लक्ष्य राखेको छ । ती दुई योजनाका लागि सरकारले १ करोड रुपैयाँ छुट्टाएको छ ।
अखिल नेपाल फुटबल संघ (एन्फा) संग सहकार्य गर्दै आएको सरकारले मुख्य मन्त्री कप र प्रदेश लिग फुटबलका लागि समान १ करोड रुपैयाँ विनियोजन गरेको छ । मन्त्री आङबोले प्रदेश १ का लागि कुल ४२ अर्ब २० करोड ४ लाख १२ हजार रुपैयाँको बजेट प्रस्तुत गरेका थिए ।
