काठमाडौं (हाम्रो खेलकुद) – थाइल्यान्ड ओपन कराते च्याम्पियनसिपको एकल कातामा रजत पदक जितेका मन्देकाजी श्रेष्ठ उत्कृष्ट खेलाडीका रुपमा पुरस्कृत भएका छन् ।

मन्दे प्लेर अफ दी टुनामेन्टको दोस्रो स्थानमा रहे र उनले ३ सय डलर प्राप्त गरे । जसमा इन्डोनेसियाका खेलाडी पहिलो र चीनका खेलाडी तेस्रोमा रहे । इन्डोनेसियाका खेलाडीले ५ सय र चीनका खेलाडीले २ सय अमेरिकी डलर प्राप्त गरे ।

आइतबार सकिने च्याम्पियनसिपमा नेपालले शनिबार १ रजत र २ कास्य पदक जितेको छ । स्वेदशमा आयोजना हुने १३ औं दक्षिण एसियाली खेलकुदको विशेष प्रशिक्षणमा रहेको कराते टोलीका सदस्य मन्देकाजी श्रेष्ठले एकल कातामा रजत पदक जितेका थिए । महिला टोलीले टिम काता र दिवस श्रेष्ठले कुमुतेमा कास्य पदक जितेको छ ।

शनिबार दिवसले ८४ केजीमा तेस्रो स्थान प्राप्त गरेका थिए । थाइल्यान्डका खेलाडी दिवससँगै कास्य, भारतका खेलाडीले रजत र चीनका खेलाडीले स्वर्ण पदक जितेका थिए । आठौं राष्ट्रिय खेलकुदका स्वर्ण पदक विजेता मन्देले फाइनलमा भने थोरै अंकले स्वर्ण पदक जित्नबाट बञ्चित भएका थिए ।
निर्मला तामाङ, कोपिला विष्ट र सरु कार्की सम्मिलित महिला टोलीले टिम कातामा कास्य पदक जितेको थियो ।