काठमाडौं (हाम्रो खेलकुद)– नेपालले थाइल्यान्डमा जारी एसिया कप इन्डोर हक्की च्याम्पियनसिपमा महिला टोली विजयी भएको छ  ।

• 

थाइल्यान्डको चोनबुरीमा बुधबार भएको समूह चरणको तेस्रो खेलमा नेपालले फिलिपिन्समाथि ३–२ को पुनरागमन जित निकालेको हो । च्याम्पियनसिपमा पहिलो जित निकालेको हो ।

नेपाल यसअघि समूह चरणको पहिलो खेलमा काजकिस्तानसँग ८–० ले तथा उज्बेकिस्तानसँग ९–० ले पराजित भएको थियो । निकै प्रतिस्पर्धात्मक बनेको खेलमा नेपालले पछि परेको स्थिति उल्ट्याएर जित हात पारेको हो । नेपालको जितमा देविका विकले दुई तथा निलिमा पाण्डेले एक गोल गरिन् ।

अब नेपालले समूह चरणको अन्तिम खेलमा बुधबार इरानसँग प्रतिस्पर्धा गर्नेछ । नेपाल रहेको समूह ‘ए’ मा उज्वेकिस्तान, काजकस्तान, इरान र फिलिपिन्स रहेका छन् । नेपालले यस प्रतियोगितामा पहिलोपटक खेलेको हो ।

पुरुष तर्फ भने नेपालले जित हात पार्न सकेको छैन । समूह चरणमा एक खेल बाँकी रहँदा नेपाल अंकविहीन हुदै पुछारमा छ । नेपालले अब अन्तिम खेलमा बिहीबार चाइनिज ताइपेइसँग खेल्नेछ ।

बुधबार नेपाल सिंगापुरसँग १७–१ को फराकिलो अन्तरले पराजित भएको हो । नेपालका लागि प्रेम विकेले एक गोल गरे । सिंगापुरका ग्रेवाल र गोहले ह्याट्रिक पुरा गरे । नेपाल पहिलो खेलमा उज्जेकिस्तानसँग १३–२ र काजकस्तानसँग १२–१ ले पराजित भएको थियो ।

• 

च्याम्पियनसिपमा पुरुषतर्फ ११ र महिलातर्फ ९ टोलीको सहभागिता रहने नेपाल हक्की संघले जनाएको छ । नेपाल हकी संघका उपाध्यक्ष मनिष झाको नेतृत्वमा रहेको टोलीमा पुरुष र महिलातर्फ समान १२ खेलाडी छन् । पुरुष टोलीको प्रशिक्षकमा बाबुराम नेपाल र महिला टोलीको प्रशिक्षकमा रन्जन थापा छन् ।