काठमाडौं (हाम्रो खेलकुद) – विभागीय डर्वी भिडन्तमा त्रिभुवन आर्मी क्लबलाई पराजित गर्दै नेपाल पुलिस क्लब सातौं केएनपी नेरोलेक राष्ट्रिय महिला भलिबल प्रतियोगिताको फाइनलमा प्रवेश गरेको छ ।

राउन्ड रोविन लिगको अन्तिम खेलमा आर्मीलाई ३–१ को सेटमा पराजित गर्दै पुलिसले फाइनलमा स्थान सुरक्षित गरेको हो । पहिलो खेल गुमाएको पुलिसले त्यसपछि दोस्रो खेलमा चन्द्रागिरि नगरपालिका न्यु डायमण्ड महिला भलिबल टिमलाई पराजित गर्दै फाइनल पुग्ने सम्भावना जीवित राख्दा अर्काे खेलमा आर्मीलाई हराएर उपाधि नजिक पुगेको हो ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको खेलको पहिलो सेटमा पुलिस २५–१९ ले विजयी भएको थियो । पुलिसले दोस्रो सेट १७–२५ ले गुमाउन पुग्यो । तेस्रो सेट २५–१५ ले आफ्नो पक्षमा पार्दै पुलिस जित नजिक पुग्यो । चौथो सेटमा पनि पुलिसले २५–१३ को एकपक्षीय जित निकाल्यो ।

पुलिसकी लक्ष्मी चन्द प्लेयर अफ दि म्याच भइन् । उनले ट्रफीसँगै १५ हजार रुपैयाँ प्राप्त गरिन् । यस जितसँगै पुलिसले ३ खेलबाट ६ अंक बटुल्यो । आर्मीले १ अंक मात्रै जोड्न सक्यो ।

आज नै राउन्ड रोविन लिगको अन्तिम खेलमा साविक विजेता चन्द्रागिरि नगरपालिका न्यु डायमण्ड महिला भलिबल टिम र साविकको उपविजेता विभागीय नेपाल एपिएफ क्लबबीच खेल हुनेछ ।

यस खेलमा जित हात पार्ने टोली फाइनलमा पुग्नेछ । ३–२ को सेटमा पराजित भएको अवस्थामा पनि एपिएफ फाइनलमा पुग्नेछ । न्यु डायमण्डलाई भने स्पष्ट ३ अंकको खाँचो छ । एपिएफको ५ तथा न्यु डायमण्डको ३ अंक छ ।

शनिबार फाइनल र तेस्रो स्थानको लागि प्रतिस्पर्धा हुनेछ । राउन्ड रोविन लिगपछि शीर्ष दुई टोलीले फाइनल र पुछारका दुई टोलीले तेस्रो स्थानको लागि खेल्नेछन् । फाइनल शनिबार हुनेछ । शेरबहादुर खड्का स्मृति प्रतिष्ठानको आयोजनामा बुधबारबाट शुरु भएको प्रतियोगितामा नेपालका शीर्ष चार टोलीको सहभागिता रहेको छ ।

प्रतियोगिताको विजेता टोलीले ४ लाख ९९ हजार रुपैयाँ प्राप्त गर्नेछ। दोस्रो टोलीले २ लाख ५० हजार, तेस्रोले १ लाख २५ हजार र चौथो टोलीले ६२ हजार रुपैयाँ प्राप्त गर्नेछ । यसपटक विजेताले गत वर्ष भन्दा १ लाख ९९ हजार रुपैयाँ बढी प्राप्त गर्नेछ ।

प्रतियोगिताको सर्वोत्कृष्ट खेलाडीले ५० हजार रुपैयाँ प्राप्त गर्नेछिन् । विधागततर्फ उत्कृष्ट हुनेलाई २५ हजार र हरेक खेलको प्लेयर अफ दि म्याचले १५ हजार रुपैयाँ प्राप्त गर्नेछन् ।

प्रतियोगितालाई राष्ट्रिय खेलकुद परिषद् (राखेप), प्रदेश खेलकुद परिषद बागमती प्रदेश र विभिन्न कर्पोरेट हाउसहरुले सहयोग गरेका छन् । पुरस्कार राशि १३ लाख रुपैयाँ बढी रहेको प्रतियोगिताको अनुमानित बजेट करिब ५० लाख रुपैयाँ रहेको छ ।