काठमाडौं (हाम्रो खेलकुद)–थाइल्यान्ड ओपन कराते च्याम्पियनसिपका पदकधारीसहित नेपाली कराते टोली बुधबार स्वदेश फर्किएको छ । नेपाली टोली बुधबार दिउसो स्वदेश आइपुगेको हो । च्याम्पियनसिपमा नेपालले १ रजत र दुई काय हात पारेको थियो ।

स्वदेशमा आयोजना हुने १३औं दक्षिण एसियाली खेलकुदको विशेष प्रशिक्षणमा रहेको कराते टोलीका सदस्य मन्डेकाजी श्रेष्ठले एकल कातामा रजत पदक जितेका थिए । निर्मला तामाङ, कोपिला विष्ट र सरु कार्की सम्मिलित महिला टोलीले टिम कातामा कास्यपदक तथा दिवस श्रेष्ठले कुमुतेको ८४ केजी तौलसमूहमा कास्यपदक जितेको थियो ।

एकल कातामा रजत पदक जितेका मन्देकाजी श्रेष्ठ उत्कृष्ट खेलाडीका रुपमा पुरस्कृत भए । मन्डेले प्लेयर अफ दी टुनामेन्टको दोस्रो स्थानमा रहदै ३ सय डलर प्राप्त गरे । जसमा इन्डोनेसियाका खेलाडी पहिलो र चीनका खेलाडी तेस्रोमा रहे । इन्डोनेसियाका खेलाडीले ५ सय र चीनका खेलाडीले २ सय अमेरिकी डलर प्राप्त गरे ।

नेपाली टोलीलाई नेपाल कराते महासंघका सह अध्यक्ष दावा गुरुङ, सचिव ओमकृष्ण प्रसाई, राष्ट्रिय टिमका मुख्य प्रशिक्षक कुशल श्रेष्ठ, प्रशिक्षक गंगाराम महर्जन लगायत कराते खेलाडीहरुले स्वागत गर्न त्रिभुवन विमानस्थल पुगेका थिए ।