काठमाडौं (हाम्रो खेलकुद)- एसिया कप इन्डोर हक्की च्याम्पियनसिपमा नेपाली पुरुष हक्की टोलीले नवौं स्थान हात पारेको छ ।

शनिबार थाइल्यान्डको चुनवरीमा नवौं र १०औंको लागि भएको प्ले अफमा फिलिपिन्सलाई ३–० ले पराजित गर्दै नेपालले नवौं स्थान हात पारेको हो । यससँगै नेपालले च्याम्पियनसिपमा सान्त्वना जित निकाल्न सफल भयो ।

नेपालको जितमा नवीन क्षेत्रीले २ तथा रोमन रानाले एक गोल थपेका थिए । खेलको १८औं मिनेटमा नवीनको गोलबाट नेपाल अघि बढेको थियो । ३१औं मिनेटमा रोमनले अग्रता दोब्बर पारे । ३४औं मिनेटमा नवीनले व्यक्तिगत दोस्रो गोल गर्दै जित पक्का गरे ।

च्याम्पियनसिपमा पुरुषतर्फ नेपालसहित १० टोलीको सहभागिता रहेको थियो । समूह चरणमा दुवै टोली जितविहीन हुदै पुछारमा रहेको थियो । महिलातर्फ पनि नेपालले समूह चरणमा फिलिपिन्समाथि ३–२ को रोमाञ्चक जित निकालेको थियो ।

समूह चरणमा नेपाल सिंगापुरसँग १७–१, उज्जेकिस्तानसँग १३–२, काजकस्तानसँग १२–१ ले र चाइनिज ताइपेइसँग ७–६ ले पराजित भएको थियो । च्याम्पियनसिपमा पुरुषतर्फ १० र महिलातर्फ ९ टोलीको सहभागिता छ ।

महिलातर्फ नेपालले सातौ र आठौंका लागि आइतबार सिंगापुरसँग खेल्दैछ । नेपाल समूह ‘ए’ मा १ जितसहित चौथो स्थानमा रहेको थियो । समूह ‘बी’ मा सिंगापुर जितविहीन छ ।