काठमाडौं (हाम्रो खेलकुद) – नेपाली पुरुष राष्ट्रिय भलिबल टोलीले करिव १ वर्षपछि आज अन्तर्राष्ट्रिय खेल खेल्दैछ । नेपालमै आयोजना हुने एभीसी एसियन सेन्ट्रल जोन सिनियर पुरुष भलिबल च्याम्पियनसिप अघि नेपालले आज अफगानिस्तानसँग अन्तर्राष्ट्रिय मैत्रीपुर्ण खेल खेल्न लागेको हो ।
नेपालले गत वर्ष इन्डोनेसियाको जकार्तामा भएको एसियन गेम्समा भलिबलमा प्रतिस्पर्धा गरेको थियो । त्यसयता, नेपाली टोलीले अन्तर्राष्ट्रिय प्रतियोगिता खेलेका छैनन् । नेपालले एसियन गेम्समा १५औं स्थान हात पारेको थियो ।
समूह चरणबाटै बाहिरिएको नेपालले वरीयताका लागि हुने खेलमा मंगोलिया र किर्गिस्तानलाई पराजित गर्दा श्रीलंकासँग हार बेहोर्दै १५आं स्थान हात पारेको थियो । नेपाल र अफगानिस्तानबीचको खेल दिउसो ३ बजेपछि लगनखेलस्थित नेपाली सेनाको कभर्डहलमा हुनेछ । उक्त खेलको हाम्रो खेलकुद डटकमले प्रत्यक्ष प्रसारण गर्नेछ ।
नेपाली टोलीका कप्तान इम बहादुर रानाले अफगानिस्तानसँगको खेलले प्रतियोगितामा गल्ती सच्याउने अवसरको रुपमा रहने बताए । अफगान टिमका प्रशिक्षक तथा कप्तानले आफूहरुको मुख्य लक्ष भनेको उपाधी हात पार्ने नै हो भन्दै प्राय सवै टोलीको खेलसंग आफूहरु जानकार रहेको बताएका छन् ।
भदौ २ गतेदेखि ७ गतेसम्म हुने पाँचौं एसियन सिनियर पुरुष सेन्ट्रल जोन भलिबल च्याम्पियनसिपका लागि अफगान टोली मंगलबार काठमाडौं आइपुगेको छ । सेन्ट्रल जोनमा नेपाल र अफगानिस्तानसहित बंगलादेश, कीर्गिस्तान, माल्दिभ्स, तुर्केमिनिस्तान र उज्वेकिस्तानले प्रतिस्पर्धा गर्नेछ ।
