काठमाडौं (हाम्रो खेलकुद)– उज्वेकिस्तान समूह ‘बी’को विजेताका रुपमा एभिसी एसियन सेन्ट्रल जोन च्याम्पियनसिपको सेमिफाइनलमा पुगेको छ । च्याम्पियनसिपका सेमिफाइनल पुग्ने उज्वेकिस्तान दोस्रो टोली हो । लगातार दुई खेल जित्दै समूह एबाट कीर्गिस्तान यसअघि नै अन्तिम चारमा पुगेको हो ।
समूह चरणमा लगातार सबै तीन खेल जित्दै उज्वेकिस्तान ९ अंकका साथ अन्तिम चारमा पुगेको हो । लगनखेलस्थित नेपाली सेनाको कभर्ड हलमा बुधबार उज्वेकिस्तानले अफगानिस्तानलाई ३–० को सोझो सेटमा हराएको थियो । उज्वेकिस्तानले खेल २५–२३, २९–२७ र २९–२७ ले जितेको थियो ।
कडा टक्कर दिएर पनि अफगानिस्तान कुनै पनि सेट जित्न असफल रह्यो । च्याम्पियनसिप अघि नेपालसँग खेलेको दुवै मैत्रीपूर्ण खेल पनि अफगानिस्तानले समान ३–२ ले गुमाएको थियो ।
पहिला दुई खेलमा उज्वेकिस्तानले साविक विजेता तुर्केमिनिस्तान र बंगलादेशलाई हराएको थियो ।
तुर्केमिनिस्तानले अफगानिस्तानलाई हराउँदै ३ अंक जोडेको समूहमा अफगानिस्तानको २ अंक छ भने बंगलादेश अंक विहिन छ । आजै ७ बजे बंगलादेश र तुर्केमिनिस्तानबीच समूह ‘बी’को अन्तिम खेल हुनेछ । त्यो खेलको नतिजाले समूहको उपविजेताको टुंगो लगाउनेछ ।
आज दोस्रो खेलमा नेपाल र माल्दिभ्सबीच प्रतिस्पर्धा हुँदैछ । समूह एबाट कीर्गिस्तान यसअघि नै विजेताका रुपमा सेमिफाइनल पुगिसकेको छ । अब नेपाल र माल्दिभ्सबीचको विजेता समूह ‘ए’को उपविजेताका रुपमा अन्तिम चारमा पुग्नेछ ।
तीन वर्षअघि यहि प्रतियोगितामा पहिलो पटक कास्य पदक जितेको नेपालका लागि यसपटक पदक जित्ने सम्भावना जीवित राख्न आजको खेल जित्नै पर्ने बाध्यता छ ।
