काठमाडौं (हाम्रो खेलकुद) – समूह चरणबाट बाहिरिएका दुई टोली नेपाल र अफगानिस्तानले एभिसी एसियन सेन्ट्रल जोन भलिबल च्याम्पियनसिपको पाँचौं वरियताका लागि प्रतिस्पर्धा गर्ने भएका छन् ।

दुवै खेल हार्दै समूह ‘ए’को पुछारमा रहेको नेपालले शुक्रबार हुने पाँचौ र छैटौं स्थानको खेलका लागि अफगानिस्तानसँग प्रतिस्पर्धा गर्ने तय भएको हो । समूह ‘बी’मा रहेको अफगानिस्तान उक्त समूहको तेस्रो स्थानमा रहेका कारण पाँचौं वरियताका लागि प्रतिस्पर्धा गर्ने मौका पाएको हो ।

चार टोली रहेको समूह चरणमा बंगलादेशलाई हराएको अफगानिस्तान समूहको तेस्रो स्थानमा रहेको थियो । तीन टोली रहेको समूहमा दुवै खेल हारेपछि नेपाल स्वतः तेस्रोमा रहेको थियो । बंगलादेश भने च्याम्यिनसिपको पुछारको टोली रहेको छ ।

नेपाल र अफगानिस्तानबीच एक सातामा तेस्रो पटक खेल हुन लागेको हो । च्याम्पियनसिप अघि बुधबार र बिहीबार नेपाल र अफगानिस्तान बीच दुई मैत्रीपूर्ण खेल भएका थिए । दुवै खेलमा नेपालले अफगानिस्तानलाई ३–२ ले हराएको थियो ।

च्याम्पियनसिपको तेस्रो स्थान र पाँचौं स्थानका लागि खेल शुक्रबार हुनेछ । च्याम्पियनसिमा बुधबार सेमिफाइनल खेल हुनेछन् । पहिलो सेमिफाइनलमा कीर्गिस्तान र तुर्किमिनिस्तान बीच प्रतिस्पर्धा हुनेछ । अर्को सेमिफाइनलमा उज्वेकिस्तानले माल्दिभ्सको सामना गर्नेछ ।