दुवईमा प्रिन्स र सानियाको जोडीलाई पदक पक्का

काठमाडौं (हाम्रो खेलकुद) – नेपाल जुनियर च्याम्पियन प्रिन्स दाहाल दुवईमा जारी दुवई जुनियर इन्टरनेसनल ब्याडमिन्टन सिरिजको यु–१९ ब्वाइजको सेमिफाइनलमा प्रवेश गरेका छन् ।

दुवईस्थित एनएएस स्पोर्टस् कम्प्लेक्समा शुक्रबार भएको क्वाटरफाइनलमा प्रिन्सले प्रतियोगिताको तेस्रो वरीयताका रोहन गुर्वानीलाई २–० को सोझो सेटमा पराजित गर्दै अन्तिम चारमा पुग्न सफल भएको हो । पहिलो सेटमा २१–१६ को सहज जित निकालेको प्रिन्सले दोस्रो सेट आफ्नो पक्षमा पार्न निकै मिहेनत गर्नुपरेको थियो ।

निकै प्रतिस्पर्धात्मक खेलमा प्रिन्स दोस्रो सेटमा २४–२२ ले विजयी हुन सफल भयो । अब प्रिन्सले सेमिफाइनलमा युएई शीर्ष तथा बसन्त कुमार राजेन्दरनसँग प्रतिस्पर्धा गर्ने प्रिन्सका व्यवस्थापक कमलेस निरौलाले जानकारी गराए ।

यसअघि मिक्स यु–१९ मा प्रिन्स र सानियाको जोडीले घरेलु टोली युएईका बसन्तकुमार राजेन्दरन र तानिका नितुको जोडीमाथि २–१ को सेटमा जित निकाल्दै सेमिफाइनलमा स्थान बनाउदै पदक पक्का गरेका हुन् । शुरुवाती सेट ९–२१ ले गुमाएपनि त्यसपछिको दुवै सेटमा प्रिन्सको जोडी २१–१९ र २१–१६ ले विजयी रहन सफल भयो । दुवै सेमिफाइनल शनिबार हुनेछ ।