काठमाडौं (हाम्रो खेलकुद)- नेपाली ब्याडमिन्टन स्टार रत्नजित तामाङ, दिपेश धामी, प्रिन्स दाहाल र नवीन श्रेष्ठ योनेक्स सनराइज अन्नपुर्ण नेपाल इन्टरनेसनल ब्याडमिन्टन सिरिजको क्वाटरफाइनलमा प्रवेश गरेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको पुरुष एकलमा नेपाल नम्वर वान रत्नजित तामाङले नेपालकै विष्णु कटवालाई २१–७ र २१–१२ को सोझो सेटमा हराएर अन्तिम आठमा पुग्न सफल भए ।

नेपालको दोस्रो वरीयताका दिपेश धामीले पुर्व नेपाल च्याम्पियन बिकास श्रेष्ठलाई २१–१५ र २१–१३ ले हराउदै क्वाटरफाइनलमा पुग्न सफल भए । नेपाली ब्याडमिन्टनका युवा स्टार प्रिन्स दाहालले मलेसियाका दातु मोद शाह इज्लान सार्दिकलाई २–१ को सेटमा पराजित गरे । पहिलो सेट १५–२१ ले गुमाएपनि प्रिन्सले त्यसपछिको दुवै सेट २१–१७ र २१–१३ ले जित्न सफल भयो ।

पुरुष एकलमै नवीन श्रेष्ठले अष्ट्रेलियाका ड्यानियल फानलाई २–१ को सेटमा पराजित गरे । नवीनले पहिलो सेट २१–१५ ले आफ्नो पक्षमा पारेको थियो । दोस्रो सेट १८–२१ ले गुमाएपनि तेस्रो सेट २१–१६ ले आफ्नो पक्षमा पार्न सफल भएको थियो ।

पुरुष एकलमा भारतका स्वर्णाज बोरा, मलेसियाका सेङ जोइ यह, बंगलादेशका मोहम्मद सलमान खान र भारतका कार्तिके गुल्सान कुमारले अन्तिम आठको यात्रा तय गरे । महिला एकलमा नेपालकी सीता राई र सीमा राजवंशीले क्वाटरफाइनल यात्रा तय गरिन् । सीताले नेपालकै लोक्तमा राईलाई २१–१६ र २१–१७ ले हराइन् ।

सीमाले नेपालकै सुनैना मुखियालाई २१–१७ र २१–१७ ले पाखा लगाइन् । जापानकी युरी नाकामुरा, चिका सिङ्गेयामा, ताइपेइका युइ चेय र भारतकी गायत्री गोपीचन्द पुलेला र समिया इमाद फारोकुईले अन्तिम आठको यात्रा तय गरिन् । नेपालकी नङ्सलदेवी तामाङले खेल्न बाँकी छ ।
पुरुष डबल्स्मा नेपालका रत्नजित तामाङ र दिपेश धामीको जोडीले नेपालकै सुरोज महर्जन र साजनकृष्ण ताम्रकारको जोडीलाई २१–१३ र २१–१७ ले हराए । प्रिन्स दाहाल र नवीन श्रेष्ठको जोडी, बिकास श्रेष्ठ र बिजित थापामगरको जोडी र इरफान अन्सारी र रियाज अन्सारीको जोडी क्वाटरफाइनलमा पुग्न सफल भए ।

मलेसियाका इजात फरहान र जाचारी चोइङ सेन सियाको जोडी तथा भारतका प्रतिक रनादे र एक्सन सेट्टीको जोडी, हिमांशु मित्तल र शुभम शर्माको जोडी र रोहन कपुर र सौरह शर्माको जोडीले पनि अन्तिम आठको यात्रा तय गरे ।

मिक्स डबल्स्मा नेपालका रत्नजित र नङ्सलदेवीको जोडी, दिपेश र शोभाको जोडी, नवीन श्रेष्ठ र अनुमाया राईको जोडी, गौतम कठायत र सम्झना शर्माको जोडीले क्वाटरफाइनलमा स्थान सुरक्षित गरे । भारतका कृतेश धिन्दवाल र अनुभा कौसिकको जोडी र थाइल्यान्डका बोवर्नवान्तानुवोङ फुथापन इन्डोनेसियाका रिरिन एमेलियाको जोडीले क्वाटरफाइनलमा स्थान बनाए ।