काठमाडौं (हाम्रो खेलकुद) – नेपाल घोडचढी संघको आयोजनामा छैटौ संस्करणको राष्ट्रिय घोडचढी प्रतियोगिता (नेसनल इक्वेस्टेरियन च्याम्पियनसिप) अर्कोे साता आयोजना हुने भएको छ । आयोजक नेपाल घोडचढी संघले शुक्रबार राजधानीमा पत्रकार सम्मेलनमार्फत प्रतियोगिताको छैटौं संस्करण पुस २५ गते टुडिखेलमा हुने जानकारी गराइयो । प्रतियोगिता यसपटक संघका महासचिव स्वर्गिय महासचिव बलराम श्रेष्ठको समर्पणमा हुनेछ ।

प्रतियोगिताको तीन विधामा २६ राइडरको सहभागिता रहने संघका अध्यक्ष रवि राज कर्णिकारले पत्रकार सम्मेलनमा जानकारी गराए । प्रतियोगितामा टेन पेकिङ, सो जम्प र हाइजम्पको विधामा प्रतिस्पर्धा हुनेछ । प्रतियोगिताको सबै तीन विधाको विजेताले २० हजार रुपैया हात पार्नेछ । दोस्रो हुनेले १५ हजार तथा तेस्रो हुनेले १० हजार रुपैयाँ प्राप्त गर्ने बताइएको छ ।

महिलातर्फको सहभागी ६ खेलाडीलाई प्रोत्साहन स्वरुप जनही ५ हजार रुपैया प्रदान गरिने अध्यक्ष कर्णिकारले थपे । उनले घोढचडी प्रतियोगिता विभागमै सीमित भइरहेको अवस्थामा पब्लिकका जाने प्रयास भइरहेको बताए ।

‘यो प्रतियोगिता विभागमा मात्रै सीमित हुदै आएको छ । घोडा पाल्न गाह्रो छ । तर पनि हामी पब्लिकमा जाने प्रयास गरिरहेका छौं । पब्लिकमा जान सके फाइदा संघलाई नै हुने हो, अध्यक्ष राजकर्णिकारले भने, ‘हामीलाई नेपाल ओलम्पिक कमिटी (एनओसी) र राष्ट्रिय खेलकुद परिषद (राखेप)बाट पनि सहयोग हुने विश्वास छ । इन्टरनेसनल इक्वेस्टेरियन एसोसिएसनको मान्यता पाउन बाँकी छ । यो वर्ष अन्य दुई राष्ट्रले मान्यता पाएका कारण अर्को नोभेम्बरसम्ममा मान्यता पाउन सक्नेछ ।’

अध्यक्ष राजकर्णिकारले प्रतियोगिताको अनुमाति खर्च ९ देखि १२ लाख हुन सक्ने आयोजकले बतनाएको छ । प्रतियोगितालाई टिभिएस मोटर्स, मिचुविसी मोटर्स र कतार एयरवेजले प्रायोजन गरेका छन् । राखेप र भ्रमण वर्ष २०२० अभियानबाट पनि संघले सहयोगको अपेक्षा गरेको छ ।
यस्तै प्रतियोगिताको लागि शुक्रबारै तीन नीजि कम्पनीसँग प्रतियोगिताको लागि सम्झौता भएको छ । टिभिएसबाट सेन्स एन्ड विजनेस डेभलभमेन्टका जनरल म्यानेजर दीपक प्रसाद रौनियार र संघका अध्यक्ष राजकर्णिकारले हस्ताक्षर गर्दै आदान प्रदान गरे । टिभिएसले २ लाख रुपैया उपलब्ध गराउनेछ ।

कतार एयरवेजका सेल्स म्यानेजर सारिक बोगटी र संघका अध्यक्ष राजकर्णिकारले हस्ताक्षर गर्दै आदान प्रदान गरे । कतार एयरवेजले जुनसुकै रुटको हवाइ टिकट उपलब्ध गराउनेछ । मित्सुबिसीका प्रतिनिधि निवास सिंहले सम्झौतामा हस्ताक्षर गरे । मित्सुबिसीले पनि २ लाख रुपैया उपलब्ध गराउनेछ ।

सम्झौतापछि टिभीएसका सेन्स एन्ड विजनेस डेभलभमेन्टका जनरल म्यानेजर रौनियारले कम्पनी नाफामुलक रहेपनि नेपाली खेल क्षेत्रलाई कसरी प्रोत्साहन गर्न सकिने भनेर नै पार्टनरको रुपमा अघि बढेको बताए । उनले टिभिएसले विगत देखि नै खेलकुद क्षेत्रमा सहयोग गर्दै आएको बताए ।

कतार एयरवेजका सेल्स म्यानेजर बोगटीले घोडचढी खेलसँग जोडिन पाउदा गर्व महसुस भएको र पछिल्लो समय कतार एयरवेजेले नेपाली फुटबलको मेरुदण्ड सहिद स्मारक ‘ए’ डिभिजन लिगलाई पनि मुख्य प्रायोजन गरेको स्मरण गरे । मित्सुबित्सुका प्रतिनिधि सिंहले कम्पनीको सामाजिक उत्तर दायित्व अन्तरगत नै यो प्रतियोगितासँग जोडिएको बताए ।