काठमाडौं (हाम्रो खेलकुद) – पाँच पटकका राष्ट्रिय च्याम्पियन पूर्व बक्सिङ खेलाडी ओमप्रकाश शर्माको उपचारका लागि नेपाल बक्सिङ संघका सदस्य ओमनारायण श्रेष्ठले आर्थिक सहयोग गरेका छन् । प्यारालाइसिसबाट थलिएका शर्माको उपचारका लागि श्रेष्ठले ५० हजार रुपैयाँ सहयोग गरेका हुन् ।

मरु गणेशस्थित शर्मा निवासमै पुगेर श्रेष्ठले बुधबार चेक हस्तान्तरण गरेका हुन् । लामो समयदेखि उच्च रक्तचापबाट पीडित शर्मा एक महिना अघि प्यारालाइसिसबाट थलिएका थिए ।
२०३३ सालबाट बक्सिङ खेल्न थालेका शर्माले भारतको मुम्बईमा भएको एसियन च्याम्पियनसिपलगायत विभिन्न अन्तर्राष्ट्रिय प्रतियोगितामा पनि सहभागिता जनाएका थिए ।

संघका सदस्य श्रेष्ठले शर्माको उपचारका लागि थप सहयोग जुटाउन अभियान सञ्चालन पनि सुरु गरिएको बताए । ‘उहाँको उपचारका लागि हामीले साथीभाइसँग समन्वय गरिरहेका छौं’, उनले भने, ‘देश तथा विदेशबाट सहयोग संकलन भएपछि फेरि उहाँलाई हस्तान्तरण गर्ने छौं ।’

श्रेष्ठले यसअघि पनि अप्ठेरोमा परेका खेलाडी, प्रशिक्षकलगायतलाई सहयोग गर्दै आएका छन् । केही महिना अघि निजी खर्चमा १३ औं दक्षिण एसियाली खेलकुदमा सहभागी १६ खेलाडीसँगै प्रशिक्षक र रेफ्रीजर्जको कोरोना बीमा गरिदिएका थिए ।