काठमाडौं (हाम्रो खेलकुद)– चालु आर्थिक वर्ष सुरु भएबाट रोकिएको ओलम्पियन, एसियाली खेलकुदका पदक विजेता र दक्षिण एसियाली खेलकुद (साग) को स्वर्ण पदक विजेताको प्रोत्साहन भत्ताका विषयमा युवा तथा खेलकुद मन्त्रालयले कार्यविधि तयार गर्ने भएको छ ।

नव नियुक्त युवा तथा खेलकुद मन्त्री दावा लामाले पदभार ग्रहण गरेपछिको पहिलो निर्णयका रुपमा कार्यविधिको मस्यौदाका लागि मन्त्रालयका सह सचिव भक्तबहादुर ढकालको संयोजकत्वमा ७ सदस्यीय कार्यदल गठन गरेका छन् ।

प्रोत्साहन भत्तालाई व्यवस्थित गर्न र प्रणाली स्थापनाका लागि मस्यौदा तयार पार्न कार्यदल गठन गरिएको मन्त्रालयका सचिव रामप्रसाद थपलियाले जानकारी दिए । कार्यदललाई १५ दिन भित्र मस्र्यादा बुझाउन भनिएको छ । कार्यदलमा मन्त्रालयका लेखा, खेल प्रबर्दन शाखा, योजना शाखा, राष्ट्रिय खेलकुद परिषद् (राखेप) र प्रदेश खेलकुद परिषद्का प्रतिनिधि रहेका सचिव थपलियाले जानकारी दिए ।

अघिल्लो आर्थिक वर्षसम्म मन्त्रालयले राखेपमार्फत ओलम्पियनलाई मासिक ४ हजार तथा एसियाली खेलकुदका कुनै पनि पदक विजेता र सागका स्वर्ण पदक विजेतालाई मासिक ६ हजार रुपैयाँ प्रोत्साहन भत्ता दिदै आएको थियो । कार्यविधि विना राखेपले निर्णयका आधारमा भत्ता उपलब्ध गराउँदै आएको भन्दै मन्त्रालयले भत्ता रोकेको थियो ।

कार्यविधि बनेपछि कसरी प्रोत्साहन भत्ताको विषयमा मन्त्रालयको धारणा प्रष्ट आउने सचिव थपलियाले जानकारी दिए । तत्कालिन खेलकुद मन्त्री जगतबहादुर विश्वकर्मालाई पद मुक्त गर्दै मंगलबार प्रधानमन्त्रीले लामालाई खेलकुद मन्त्री नियुक्त गरेका थिए । विश्वकर्मा २०७४ चैत २ गते मन्त्री नियुक्त भएका थिए । मन्त्रालयमा आइतबार लामाको स्वागत र विश्वकर्माको विदाईको कार्यक्रम राखिएको थियो ।