काठमाडौं (हाम्रो खेलकुद) – विश्व बजारमा बढ्दो क्रेज रहेको ई-स्पोर्ट्सबाट नेपाली बजार पनि अछुतो छैन । पछिल्लो समय ई-स्पोर्ट्समा आबद्ध हुनेको संख्या बढ्दो छ । यसैलाई मध्यनजर गर्दै ‘द रियल सोल्जर्स’ (डीआरएस ) गेमिङ्ग आधिकारिक रुप दर्ता गर्दै नयाँ व्यवस्थापनमा अघि बढेको छ ।

सन् २०२० अगस्टमा अशेष राई र रिजन खत्रीले स्थापना गरेको पब्जी टिमलाई नयाँ व्यवस्थापनले अधिकारिक रुपमा दर्ता गराएर अगाडी बढेको हो । नेपालमा पब्जी र ई-गेमिङ्गलाई व्यवसायिक बनाउने लक्ष्यसहित व्यवस्थापनले विभिन्न योजना अघि सारेको छ । यसअघि नै ग्लोबल च्याम्पियन्सिपमा सहभागी भइसकेको डीएसआरमा अनुबन्धित भएका खेलाडीले अब मासिक रुपमा तलब र भत्ता प्राप्त गर्नेछन् ।

नयाँ व्यवस्थापनले त्यससँगै बूटक्याम्प दौरानको सम्पूर्ण खर्च समेत डीआरएसले बेहोर्ने छ। हाललाई खेलाडीहरुलाई हामीले एक बर्षको लागि अनुबन्ध गरिएको छ । टिममा हाल युगेन लामा (माफिया निन्जा), अजय श्रेष्ठ (एजे), निमा तामाङ् (निमा), पेम्बा ग्याल्जेन लामा (ग्याल्जेन), अञ्जन राई (एमआरबोरो) रहेका छन् । टोलीको व्यवस्थापकको भूमिकामा सङ्गीन भट्टराई रहनेछन । आवश्यकता अनुसार अन्तर्राष्ट्रिय प्रतियोगिता तथा विदेशी प्रशिक्षकबाट विशेष प्रशिक्षण समेत प्रदान गरिने जनाएको छ ।

डीएसआर हाल साउथ एसियन चरणको खेलको तयारीमा रहेको छ । यस अघि राष्ट्रिय स्तरमा विजेता बन्दै डीआरएस साउथ एसियन चरणमा दोस्रो भएको थियो । त्यसपछिको दुबईमा भएको ग्लोबल च्याम्पियनसिपमा भने टोली २० औं स्थानमा परेको थियो । स्थापना भएको ८ महिनामै डीएसआर गेमिङ्गले अन्तराष्ट्रिय लोकप्रियता हासिल गर्न सफल हुँदै ४१ लाख नेपाली रुपैयाँ भन्दा बढी पुरस्कार जितिसकेका छ ।

कार्यक्रममा बोल्दै डिआरएस गेमिङका प्रमुख कार्यकारी अधिकृत भिक्टर पौडेलले यस कदमले नेपाली गेमिङ समुदायलाई विकास गर्ने लक्ष्य लिएर यो कदम चालिएको बताए । उनले खेलाडीहरु निकै उत्कृष्ट रहेको र अन्तर्राष्ट्रिय रुपमा नेपालको चिनाउन महत्वपूर्ण भूमिका खेल्ने अभिव्यक्ति दिए ।

खेलाडी अजय श्रेष्ठले ई-स्पोर्ट्स खेलाडीहरुलाई हेर्ने नजर बदल्न सके यसमै भबिष्य बनाउन सक्ने वातावरण बनाउन सकिनेमा जोड दिए। उनले यस कार्यक्रमले राम्रो गर्न प्रोत्साहन मिलेको बताए ।