काठमाडौं (हाम्रो खेलकुद) – पारालिम्पिक टोकियो २०२० को औपचारिक उद्घाटन आज हुँदैछ । पारालिम्पिककी एक मात्र नेपाली प्रतिस्पर्धी तेक्वान्दोकी पलेशा गोबद्र्धनले उद्घाटनको मार्च पासमा नेपालको झण्डा बोक्ने छिन् ।
पलेशासँगै मार्च पासमा सेफ दि मिसन सरोज श्रेष्ठ, प्रशिक्षक कविराज नेगी लामा र डाक्टर दीपक श्रेष्ठ रहने प्रशिक्षक लामाले जानकारी दिए । टिम अफिसरका रुपमा विश्वास बस्नेत र अफिसियलका रुपमा ओलम्पियन दीपक विष्ट पनि टोकोयो पुगेका छन् । पारालिम्पिक टोली साउन ४ गते जापान गएको थियो ।
वाइल्ड कार्डबाट सहभागिता निश्चित एकी पलेशाले के–४४ विधामा ५८ केजी तौल समूहमा प्रतिस्पर्धा गर्दैछिन् । तेक्वान्दो सेप्टेम्बर ३ मा सुरु हुनेछ । एसियन च्याम्पियनसिपमा पदक जितिसकेकी पलेशासँग विश्व च्याम्पियनसिपमा खेलेको अनुभव पनि छ ।
कोरोना संक्रमणका कारण छनोट प्रतियोगिता खेल्न जान नपाएकी पलेशा वाइल्ड कार्ड पाएपछि भाग्यमानी सावित भएकी थिइन् । पारालिम्पिक टोलीलाई खेलकुद सामाग्री उत्पादक केल्मीले ओलम्पिक टोली सरहनै सामग्री हस्तान्तरण गरेको थियो ।
पारालिम्पिकको १६ औं संस्करणमा जापानले दोस्रो पटक यसको आयोजनाको अवसर पाएको छ । यसअघि जापानले सन् १९६४ मा आयोजना गरेको थियो । यसपटक सेप्टेम्बर ५ सम्म हुने पारालिम्पिकमा २२ खेलका ५ सय ३७ इभेन्ट्समा प्रतिस्पर्धा हुँदैछ । १ सय ६३ देशका ४ हजार ५ सय ३५ जना खेलाडीले पारालिम्पिकमा प्रतिस्पर्धा गर्ने बताइएको छ । तेक्वान्दो र ब्याडमिन्टन पहिलो पटक पारालिम्पिकमा समावेश गरिएको हो ।
