काठमाडौं(हाम्रो खेलकुद) – श्रीलंकामा जारी काभा यु २० भलिबल च्याम्पियनसिपको उपाधिका लागि नेपाल र उज्जेकिस्तानबीच खेल हुँदैछ । फाइनल नेपाली समय अनुसार शनिवार दिउँसो ३ः१५ बजे सुरु हुनेछ ।

लिग चरण पहिलो र दोस्रो स्थानमा रहेर नेपाल उज्वेकिस्तान र नेपाल फाइनल खेल्न लागेका हुन् । लिगचरणमा नेपाल उज्वेकिस्तानसँग ३-१ ले पराजित भएको थियो । पहिलो खेलमा नेपालले घरेलु टोली‌ श्रीलंकालाई ३-० को सोझो सेटमा पराजित गरेको थियो ।

दोस्रो खेलमा उज्वेकिस्तानसँग ३-१ ले पराजित नेपालले तेस्रो खेलमा माल्दिभ्सलाई ३-० को सेटमा पराजित गरेको थियो । बिहीवार भएको खेलमा नेपालमाथि किर्गिस्तानले ३-२ को सेटमा जित हात पारेको थियो । शुक्रवार भएको लिगको अन्तिम खेलमा नेपालले तुर्किमेनिस्तानलाई ३-० को सोझो सेटमा पराजित गरेको थियो ।

केहि महिनाअघि काठमाडौंमा‌ भएको यु १९ भलिबल च्याम्पियनसिपमा गरेको प्रदर्शनबाट खेलाडी छनोट गरिएको हो ।

सोही प्रतियोगिताको महिला प्रतियोगितामा भाग लिएर छनोट भएका टोलीले साउनमा माल्दिभ्समा भएको काभा यु २० च्याम्पियनसिपमा कास्य पदक जितेको थियो ।

नेपाली टोली – पहल गहतराज, सुरेश मल्ल, शैलेन्द्र यादव, सुर्य विक, अर्जुन नेपाली, विश्वास अधिकारी, सागर रसौली, अशोक राना, जित बहादुर सार्की, सुजन सुनार, लेसमन राहादी र दिपेश कुवँर।