गोरखा (हाम्रो खेलकुद) – दोस्रो दिल बहादुर स्मृति कप खुल्ला पुरुष भलिबल प्रतियोगिता बैशाख दोस्रो सातादेखि आयोजना हुने भएको छ ।
बारपाक सुलिकोट गाउपालिकाको आयोजना तथा वडा नम्वर १ र २ को व्यवस्थापनमा दोस्रो संस्करणको प्रतियोगिता बैशाख १२ गतेबाट १४ गतेसम्म आयोजना हुने भएको हो । प्रतियोगितामा एक टोलीमा बढीमा दुई जना राष्ट्रिय खेलाडी राख्न पाउने प्रावधान राखिएको छ । जिल्ला बाहिरका खेलाडीलाई खाना र बस्नको व्यवस्था गरिएको आयोजकले जानकारी गराएको छ । प्रतियोगितामा सहभागिताका लागि ५ हजार ५ सय दर्ता शुल्क तोकिएको छ ।
प्रतियोगिताको विजेताले १ लाख ५ हजार रुपैयाँसहित शिल्ड मेडल र प्रमाणपत्रा पाउनेछन् । दोस्रो हुनेले ६० हजार रूपैया तथा तेस्रो हुनेले ३० हजार रुपैयाँ हात पार्नेछ । यस्तै सान्त्वना हुनेले १५ हजार रुपैयाँ हात पार्नेछ ।
प्रतियोगिताको सर्वाेत्कृष्ट खेलाडीले ५ हजार तथा व्यक्तिगत विधातर्फका स्पाइकर, ब्लकर, क्वीकर, सेटर, सर्भर, डिफेन्स र प्रशिक्षकले समान ३–३ हजार रुपैयाँ हात पार्नेछ । प्रतियोगिताको सबै खेल बारपाक खेल मैदानमा हुनेछ ।
दिल बहादुर रम्तेल १० वर्षे सशस्त्र जनयुद्धका पहिलो सहिद हुन् । उनकै स्मृतिमा बारपाक गाउपालिकाले २०७२ को भूकम्पको केन्द्रविन्दु गोरखाको बारपाकमा प्रतियोगिता आयोजना गर्न लागेको हो । गतवर्ष साविकको देउराली गाविसमा पहिलो संंस्करण आयोजना भएको थियो ।
यसपटक भूकम्पको केन्द्रविन्दु बारपाकमा प्रतियोगिता आयोजना गर्न लागिएको र करिव २० भन्दा बढी टोलीले प्रतियोगितामा सहभागिता जनाउने अनुमान गरिएको प्रतियोगिता संयोजक तथा अन्तर्राष्ट्रिय भलिबल रेफ्री बिकास गुरुङले जानकारी गराए ।
