पोखरा (हाम्रो खेलकुद)- एसिया कप ट्राइयाथलन कपको पुरुष तर्फ अष्ट्रियाका पिटर लुफतेन्सटेनर र महिला तर्फ कोरियाकी गियोङ्गमिन पार्कले उपाधि जितेका छन् ।

पोखराको फेवा लेकमा भएको प्रतियोगितामा शनिवार पिटरले ७ सय ५० मिटर पौडी, २० कि.मि. साईक्लिङ्ग र ५ कि.मि. दौड ५३ मिनट ४५ सेकेन्डमा पूरा गर्दै उपाधि जितेका हुन् ।

इजरायलका इतामर लेभाननले ५३ मिनट ५९ सेकेन्ड समयका साथ दोश्रो , ५४ मिनट ०२ सेकेन्ड समयका साथ जापानका तेपी तोकुयामा तेस्रो भए । कोरियाका त्येगी किम चौथो र जापानका तुया कोबायासी‌ पाँचौं भए ।

महिला मापार्कले समान दुरी १ घन्टा ४१ सेकेन्डमा पूरा गर्दै उपाधि जितिन् । १ घन्टा १ मिनट ५३ सेकेन्ड समयका साथ जापानकी काने ताकेनाका दोस्रो र १ घन्टा २ मिनट ९ सेकेन्ड समयका साथ जापानकी मिनोरी इकेनो तेस्रो भइन् ।

जापानकी इकुमी सेतो चौथो र उज्वेकिस्तानकी अलिना खाकी मोभा पाँचौं भइन् । दुवैतर्फको विजेताले समान ६ सय ३० , दोस्रोले ५ सय २५ डलर र तेस्रोले ४ सय २० अमेरिकी डलर प्राप्त गरिन् । त्यस्तै चौथोले ३ सय १५ र पाँचौंले २ सय १० डलर प्राप्त गरे ।

दक्षिण एसियालीमा भारतको दबदबा

दक्षिण एसियाली च्याम्पियन तर्फ भारतले एकाधिकार जमायो । नेपाल भारत र बंगलादेशको सहभागिता रहेको प्रतियोगितामा पुरुष तर्फ भारतका सरुङ्गबाम अथोबा मेतीले ५८ मिनट १५ सेकेन्ड समयका विजयी भए ।

भारतकै पर्थ मिराजले १ घन्टा ३ मिनट २ सेकेन्ड समयका साथ दोस्रो भए । यस्तै महिलातर्फ पनि भारतलेनै स्थान कब्जा गर्यो । १ घन्टा ४ मिनट ३३ सेकेन्ड समयका साथ डोल्ली देवीदास पाटिल विजयी भइन् । मानसी मोहित १ घन्टा ६ मिनट ४२ सेकेन्ड समयका साथ दोस्रो भइन् ।

यसतै जुनियर तर्फ भारतका श्रीदथ सुदिरले १ घन्टा ६ मिनट ५ सेकेन्ड समयका साथ उपाधि जिते ।
राष्ट्रिय खेलकुद परिषद्का सदस्य सचिव टंकलाल घिसिङ्ग, नेपाल लोकतान्त्रिक खेलकुद संघका अध्यक्ष देवेन्द्र कुमार शेरचन, आयोजक नेपाल ट्राइयाथोलन संघका अध्यक्ष निलेन्द्र राज श्रेष्ठ लगायतले पुरस्कृत वितरण गरे ।

प्रतियोगितामा नेपाल सहित भारत, बंगालादेश, जापान, कोरिया, इजरायल, अष्ट्रिया, उज्वेकिस्तान, इष्टोनिया र पोटोरिकोको गरि पुरुष तर्फ ३० र महिला तर्फ १६ खेलाडीको सहभागिता थियो ।