काठमाडौं (हाम्रो खेलकुद)– नेपाली खेलाडी दक्षिण कोरियामा आयोजना हुने एसिया कप तथा अन्तर क्लब भारोत्तोलन च्याम्पियनसिपमा प्रतिस्पर्धा गर्ने भएका छन् । च्याम्पियनसिपमा भाग लिन ४ खेलाडीसहित ७ सदस्यीय नेपाली टोली मंगलबार प्रस्थान गरेको छ । च्याम्पियनसिपमा दक्षिण कोरियाको योङगु अक्टोबर २८ देखि नोभेम्बर २ तारिखसम्म सञ्चालन हुनेछ ।

नेपाली २ पुरुष र २ महिला खेलाडी प्रतिस्पर्धा गर्नेछन् । पुरुषमा दक्षिण एसियाली खेलकुद (साग) का एक मात्र नेपाली स्वर्ण विजेता खेलाडी कमलबहादुर अधिकारीले ७७ केजी तथा प्रकाश केसीले ६९ केजी तौलसमूहमा प्रतिस्पर्धा गर्नेछन् । महिलाको ५३ केजीमा सन्जु चौधरी तथा ५८ केजीमा कमला श्रेष्ठले भाग चुनौति प्रस्तुत गर्नेछन् ।

प्रकाश बाहेक तीन खेलाडी राष्ट्रिय कीर्तिमान बनाएका खेलाडी हुन् । कमलको नाममा स्न्याचमा १ सय २० र क्लिन एन्ज जर्कमा १ सय ६० केजीको कीर्तिमान छ । स्न्याचमा ६० केजी र क्लिन जर्कमा ८१ केजीको कीर्तिमान सन्जुको नाममा छ । त्यस्तै कमलाको स्न्याचमा ६८ केजी र क्लिन एन्ड जर्कमा ८५ केजीको राष्ट्रिय कीर्तिमान हो ।

केहि महिनाअघि नेपालमै भएको अन्तर्राष्ट्रिय प्रतियोगिगतामा भने सन्जुले सहभागिता जनाएकी थिइन् । प्रशिक्षकमा सञ्जय महर्जन र जीवन गौतम रहेका छन् । गौतमले टिम व्यवस्थापकको भूमिका समेत निर्वाह गर्नेछन् । अशोक शाही निर्णायकका रुपमा टोलीसंगै आयोजनास्थल गएका छन् ।

टोलीलाई राष्ट्रिय खेलकुद परिषद्का सदस्य–सचिव केशवकुमार विष्ट, कोषाध्यक्ष सुरेन्द्र हमाल र सदस्य उपेन्द्र पौडेलले सातदोबाटोमा मंगलबार बिदाई गरे । टोलीलाई भारोत्तोलन संघका उपाध्यक्ष राम श्रेष्ठले प्रायोजन गरेको ट्रयाकसुट र टिसर्ट पनि श्रेष्ठ प्रायोजन गरेका छन् ।

सदस्य–सचिव विष्टले एसियाली खेलकुदको तयारीलाई ध्यानमा राखि पुस १ गतेदेखि राष्ट्रिय टोलीको प्रशिक्षण पुनः सुरु जानकारी दिए । उनले तीन महिनापछि खेलाडीलाई वैदेशिक प्रशिक्षणमा पठाउने वा विदेशी प्रशिक्षकलाई नेपालमा झिकाएर प्रशिक्षण गराउने योजना रहेको बताए ।