काठमाडौ (हाम्रो खेलकुद)- राष्ट्रपति रामचन्द्र पौडेलले खेलकुद र पर्यटनको उर्वर भूमि भएकोले नेपालमा सबै खाले दौडको सम्भावना रहेको बताएका छन्।

विश्व म्याराथनको साझा संस्था एसोेसिएसन अफ इन्टरनेसनल म्याराथन डिस्टेन्स रेस (एम्स) म्याराथनका पदाधिकारीसँग आतवार शीतल निवासमा भएको भेटमा राष्ट्रपति पौडेलले यस्तो बताएका हुन् ।

‘सगरमाथाको काखमा साहसिक अल्ट्रा म्याराथनदेखि पश्चिम तराईको नेपालगञ्जसम्म लामो दूरीका दौड सफलतापूर्वक भइरहेका छन्, हाम्रो भौगोलिक विविधता सुहाउँदा दौडले पक्कै पनि खेल पर्यटनमा नयाँ सम्भावनाको ढोका खोल्नसक्छ भन्ने मेरो विश्वास छ, यसमा एम्सजस्ता अन्तर्राष्ट्रिय छाता संगठनहरूले प्रोत्साहन गरुन् भन्ने हाम्रो अपेक्षा छ’, राष्ट्रपति पौडेलले भने ।

उनले विश्व शान्ति, भाइचारा र सद्भावका लागि खेलको ठूलो महत्व रहेको बताए। राष्ट्रपति पौडेलले थपे, ‘त्यसमा पनि दौड संस्कृतिले स्वस्थ, स्वस्थ प्रतिस्पर्धा र समुन्नत समाजको निर्माणमा मद्दत पुग्दछ भन्ने मेरो विश्वास छ।’

नेपालले पनि खेलकुदको विकासका लागि प्रयत्न गरिरहेको र सरकारले खेलकुदमा वर्षेनी लगानी बढाइरहेको बताउँदै उनले निजी क्षेत्रबाट पनि खेलकुदमा आकर्षण बढ्दै गएको जनाए ।

उनले एम्सको बोर्ड बैठकका लागि नेपाललाई छनोट गरेकोमा धन्यवाद दिए । साथै, खेलकुद र पर्यटनलाई जोड्नेगरी नेपाल हेरिटेज रन काठमाडौँ २५ के रेस शुभारम्भ भएको थाहा पाउँदा आफूलाई खुसी लागेको राष्ट्रपति पौडेलको भनाई थियो ।

दुई दिन एम्स कार्यसमितिको बैठकपछि शुक्रवार इन्टरनेसनल कन्फ्रेन्स र शनिवार हेरिटेज रन भएको थियो।