काठमाडौं (हाम्रो खेलकुद) – टाइम्स इन्टरनेसनल कलेज अपराजित रहँदै राष्ट्रिय बास्केबल लिग (एनबिएल) च्याम्पियन बनेको छ । त्रिभुवन आर्मी क्लबलाई शुक्रबार ११५–९० ले हराउँदै सातौं जितका साथ च्याम्पियन बनेको हो ।

एनबिएलका अन्तिम दुई खेल बाँकी रहँदा १४ अंकसहित टाइम्स च्याम्पियन बनेको हो । पहिलो क्वार्टरबाट अग्रता बनाएको टाइम्सले सजिलै नतिजा आफ्नो पक्षमा पार्यो ।

पहिलो क्वार्टरमा २५–२१ ले अघि लागेको टाइम्सले दोस्रो क्वार्टर सकिदा ५८–४७ र तेस्रो क्वार्टरको समाप्तीमा ८५–६१ ले अग्रता बनायो । ३३ स्काोर गरेको टाइम्सका अम्जोत सिंह खेलको म्यान अफ दी म्याच बने ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा जारी प्रतियोगितामा शुक्रबार भएको पहिलो खेलमा कीर्तिपुर बास्केबल क्लबले विशाल मिलन केन्द्रलाई ९५–७७ ले हराएको थियो ।

तीन क्वार्टरको समाप्तीसम्म ६१–६३ ले पछि रहेको कीर्तिपुरले चौथो तथा अन्तिम क्वार्टरमा उत्कृष्ट पुनरागमनकाा साथ नतिजा आफ्नो पक्षमा पारेको थियो ।

अन्तिम क्वार्टरमा विशाल केन्द्रले १४ स्कोर गर्दा कीर्तिपुरले ३४ स्कोर थपेको थियो । ३३ स्कोर गरेका विजेता टोलीका अनिल खड्गी खेलको म्यान अफ दी म्याच घोषित भए ।

१२ अंकका साथ आर्मी दोस्रो स्थान र ११ अंकसहित कीर्तिपुर तेस्रो स्थानमा छ । एक खेल कम खेलेको रोयल स्पोर्टस सेन्ट्रल १० अंकसहित चौथो र बुढानिलकण्ठ बास्केबल क्लब ९ अंक जोडेर पााँचौं स्थानमा छ ।