काठमाडौं (हाम्रो खेलकुद) – टाइम्स बास्केटबल क्लबले
हिमालयन जाभा बास्केटबल लिग (एचजेबिएल) को उपाधि जितेको  छ ।

लगनखेलस्थित नेपाली सेना शारीरिक तालिम तथा खेलकुद केन्द्रमा शनिबार भएको फाइनलमा  गोल्डेन गेटलाई ८०-७२ ले हराएर टाइम्स च्याम्पियन बनेको हो ।

सुरुबाटै टाइम्सले खेलमा डोमिनेट गरेको थियो । पहिलो क्वाटरमा टाईम्सले २०-८ को अग्रता बनायो । दोस्रो क्वाटरमा गोल्डेन गेटले पुनरागमन गरेको थियो ।

दोस्रो क्वाटर गोल्डेनगेटले १९-१४ ले आफ्नो पक्षमा पारेपनि हाफ टाईमसम्म टाईम्सले नै ३४-२७ को अग्रता बनाएको थियो ।

तेसो क्क्वाटर २६-२१ ले आफ्नो पक्षमा पारेपछि टाईम्सले अन्तिम क्वाटरअघि ६०-४८ को अग्रता बनाएको थियो ।

चौथो तथा अन्तिम क्वाटर निकै रोमाञ्चक बन्यो । चौथो क्वाटरमा गोल्डेनगेटले फेरि पुनरागमन गर्दै २४-२० ले आफ्नो पक्षमा पारेको थियो । तर टाइम्सलाई रोक्न सकेन र ८ अंक अन्तरले च्याम्पियन बन्यो ।

यसअघि लिग चरणमा पहिलो खेलमै टाईम्सले गोल्डेनगेटलाई पराजित गरेको थियो भने त्यसपछि दोस्रो चरणमा गोल्डेन गेटले टाइम्सलाई हराएर बदला लिएको थियो ।

च्याम्पियन टाइम्सले ट्रफी सहित २ लाख रुपैयाँ प्राप्त गर्यो । गोल्डेनगेटले १ लाख तथा तेस्रो भएको हाउण्ड्सले ५० हजार रुपैयाँ प्राप्त गर्‍यो । प्रतियोगिताको मोस्ट भ्यालुएबल प्लेअर हाउण्ड्सका विजय बुर्जा घोषित भए ।

लिग चरणमा शीर्ष दुई स्थानमा रहेर गोल्डेनगेट र टाइम्सले फाइनलमा स्थान बनाएका थिए ।

आजै तेस्रो स्थानको लागि भएको खेलमा हाउण्ड्स एकेडेमीले कीर्तिपुरलाई ८०-७५ ले पराजित गर्यो । हाउण्ड्सले पहिलो क्वाटरमा २२-१३ को अग्रता बनाएको थियो ।

कीर्तिपुरले दोस्रो क्वाटर २२-१९ र तेस्रो क्वाटर २२-२० ले आफ्नो पक्षमा पारेको थियो । तर अन्तिम क्वाटरअघि हाउण्ड्स ६१-५७ ले अघि थियो । चौथो क्वाटर १९-१८ ले आफ्नो पक्षमा पार्दै हाउण्ड्सले खेल जितेको हो ।

यस्तै फाइनलअघि सेलेब्रेटी र ईन्ट्रपेनरबीच म्याच भएको थियो । जसमा ईन्ट्रपेनरले सेलेब्रेटी टिमलाई २३-२१ ले हरायो ।

नेपाल बास्केटबल संघ (नेबा) को आयोजना तथा हिमालयन जाभाको मुख्य प्रायोजनमा भएको लिगमा ६ टोलीले सहभागिता जनाएका थिए ।

पहिलो पटक विकेण्ड कन्सेप्टमा आयोजना गरिएको लिग डबल राउण्ड रोविनको आधारमा खेलाइएको थियो ।

पहिलो संस्करण सफलपूर्वक सम्पन्न भएको र आगामी संस्करणमा अझ परिस्कृत गर्दै लैजाने नेबा अध्यक्ष भिमसिंह गुरुङले बताए ।