काठमाडौं (हाम्रो खेलकुद) – विभागीय टोली त्रिभुवन आर्मी क्लबले क्विक्स नेपाल बास्केटबल लिगमा शीर्षस्थानमा उक्लने सम्भावना बलियो बनाएको छ ।
मंगलबार त्रिभुवन आर्मी क्लबले बिएमसी साउथ साइडर्सलाई ९२–७१ को अन्तरले पराजित गरेको हो । आर्मीको सहज जितमा म्यान अफ दि म्या बनेका कप्तान रविन खत्रीले २१ अंकको साथै ९ असिस्ट, ३ रिवाउन्ड र २ स्टल गरेका थिए । उनले ३ हजार रुपैयाँ पाए ।
पहिलो क्वाटरमा आर्मीले २५–१५ को आरामदायी अग्रता बनाएको थियो । दोस्रो क्वाटरमा २७–२० को अग्रता बनाएको आर्मीले तेस्रो क्वाटरमा २९–२४ को अग्रता लिदै जिततर्फ अग्रसर बनेको थियो । चौथो क्वाटर २१–२१ को बराबरीमा सकिएपनि आर्मीले अघिल्लो तीन क्वाटरमा लिएको अगता नै जितमा पर्याप्त बन्यो ।
जितसँगै दोस्रो स्थानमा रहेको आर्मीको २३ अंक पुगेको छ । आर्मीले लिगमा दुई खेल खेल्न बाँकी छ । साउथ साइडर्सको १३ अंक छ । साइडर्सलाई पराजित गरेपछि आर्मी शीर्षस्थानको टाइम्सभन्दा १ अंक पछाडी पुगेको छ । आर्मीले १ खेल कम खेलेको छ । प्रतियोगितामा बुधबार एएनके कीर्तिपुर बास्केटबल टिम र गोल्डेनकलेजबीच खेल हुनेछ ।
